• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

وی سی کے ایم یو ڈاکٹر ضیاء الحق دنیا کے ٹاپ 2 فیصد سائنسدانوں میں شامل

میرا شہر
پشاور
09 اکتوبر ، 2025
پشاور (خصوصی نامہ نگار) خیبر میڈیکل یونیورسٹی (کے ایم یو) پشاور کے وائس چانسلر پروفیسر ڈاکٹر ضیاء الحق کو اسٹینفورڈ یونیورسٹی اور ایلسویرامریکہ کی جانب سے مشترکہ طور پر جاری کردہ تازہ ترین عالمی رینکنگ میں دنیا کے ٹاپ 2 فیصد سائنسدانوں میں شامل کیا گیا ہے، یہ کامیابی پروفیسر ڈاکٹر ضیاء الحق کی طبّی تعلیم، تحقیق اور پبلک ہیلتھ کے شعبوں میں اُن کی غیر معمولی خدمات کا بین الاقوامی سطح پراعتراف ہے۔واضح رہے کہ اسٹینفورڈ یونیورسٹی کی یہ فہرست ہر سال اپ ڈیٹ کی جاتی ہے جس میں مختلف سائنسی شعبوں کے ان ممتاز محققین کو شامل کیا جاتا ہے جن کی تحقیق عالمی سطح پر نمایاں اثر رکھتی ہے۔ اس رینکنگ میں محققین کے تحقیقی حوالہ جات، تحقیقی اثر اور منصفانہ کردار کی جانچ پر مبنی معیاری اشاریئے استعمال کئے جاتے ہیں۔ قبل ازیں مارچ 2025 میں، اعلیٰ تعلیم، تحقیق اور صحتِ عامہ کے میدان میں خدمات کے اعتراف میں صدرِ پاکستان کی جانب سے پروفیسر ڈاکٹر ضیاء الحق کو ستارہ امتیاز سے بھی نوازا گیا تھا جو ملک کا ایک اعلیٰ ترین سول اعزاز ہے۔ اس اعزاز پر وزیر اعلیٰ/چانسلر کے ایم یو، وزیرصحت، یونیورسٹی کی فیکلٹی، طلبہ اور عملے کا کہنا ہے کہ پروفیسر ڈاکٹر ضیاء الحق کا دنیا کے ٹاپ 2 فیصد سائنسدانوں میں شامل ہونا جہاں اُن کی طبّی تحقیق اور اعلیٰ تعلیم کے فروغ کے لئے طویل اور مسلسل خدمات کا اعتراف ہے وہاں ان کی یہ کامیابی نوجوان محققین کے لئے بھی ایک قابل تقلید مثال ہے۔
پشاور سے مزید