فرمان الہی
نماز کے اوقات
اسلام آ باد ( رانا غلام قادر)وفاقی کابینہ نےایران ،روس اور افغانستان کے ساتھ بزنس ٹو بزنس تجارت کیلئے بارٹر ٹریڈ کے لیےمختلف شرائط ختم یا نرم کرنے کی منظوری دیدی ۔برآمد سے قبل لازمی درآمد کی سخت شرط کو نرم کرکے بیک وقت درآمد و برآمد کی اجازت ہوگی۔نجی اداروں کو کنسورشیا بنانے کی بھی اجازت ہوگی،بیرون ملک پاکستانی مشنز سے تصدیق کی شرط کو ختم کرکے اس کو مقامی نجی کمپنیوں یا گروپس کی یقین دہانی سے بدلا جائے گا۔ان اقدامات کا مقصد بارٹر ٹریڈ میکنزم کو زیادہ عملی اور کاروبار دوست بنانا ہے۔ذرائع کے مطابق ای سی سی نے اس فیصلہ کی منظوری دو اکتوبر کو دی تھی جس کی توثیق کابینہ نے جمعرا ت کے روز کی ۔ حکومتی ذرائع کے مطابق جون 2023میں افغانستان، ایران اور روس کے ساتھ تجارت کے لیے بی ٹو بی بارٹر ٹریڈ میکنزم کے نفاذ کے بعد اس پر عملدرآمد میں متعدد مسائل سامنے آئے۔ بزنس گروپس اور اسٹیک ہولڈرز نے مشکلات کی نشاندہی کی جن میں منظور شدہ اورغیر منظور شدہ مصنوعات پر قدغن، درآمد و برآمد کے لیے انتہائی محدود اشیاء کی فہرست، بیرون ملک پاکستانی مشنز سے معاہدوں کی تصدیق کی شرط، برآمدات سے قبل لازمی درآمد کی شرط اور کسٹمز کی منظوری کے نوے روز کے اندر کھاتوں کی تصفیہ کی پابندی شامل تھیں۔
