• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہفتہ وار بنیادوں پر مہنگائی میں 0.17 فیصد، سالانہ بنیادوں پر 4.34 فیصد اضافہ، 21 اشیا کی قیمتیں بڑھ گئیں

آج کا اخبار
اہم خبریں
11 اکتوبر ، 2025
لاہور( این این آئی) ملک میں ضروری اشیاء کی قیمتوں میں ہفتہ وار بنیادوں پر 0.17فیصد اور سالانہ بنیادوں پر 4.34فیصد اضافہ ریکارڈ کیا گیا، ایک ہفتے کے دوران 21اشیاء کی قیمتیں بڑھ گئیں۔ چکن، پیاز، آٹا، انڈا ، گڑ، لہسن، گھی،کی قیمتوں میں اضافہ جبکہ، ٹماٹر، کیلا، آلو، دال چنا اور سرسوں کے تیل کی قیمتوں میں کمی ریکارڈ کی گئی۔ پاکستان بیورو برائے شماریات کے مطابق صارفین کیلئے قیمتوں کا حساس اشاریہ 332.75پوائنٹس ریکارڈ کیا گیا جو گزشتہ ہفتہ 332.17فیصد اور گزشتہ سال اسی تاریخ کو 318.91پوائنٹس تھا۔ہفتہ کے دوران 6ضروری اشیا ء کی قیمتوں میں کمی،21کی قیمتوں میں اضافہ اور 24کی قیمتوں میں استحکام رہا۔ ٹماٹر کی قیمت میں 11.34فیصد، کیلا1.29فیصد، آلو0.93فیصد، دال چنا 0.35فیصد اور سرسوں کے تیل کی قیمت میں0.07فیصد کی کمی ہوئی۔ اسکے برعکس چکن کی قیمت میں 8.92فیصد، پیاز 7.47 فیصد، آٹا5.74فیصد، انڈے 2.25فیصد، گڑ 1.70 فیصد، لہسن و ایک کلو بناسپتی گھی 0.86 فیصد، اڑھائی کلو بناسپتی گھی 0.59فیصد، جلانے کی لکڑی 0.50 فیصد اور واشنگ سوپ کی قیمت میں 0.23فیصد اضافہ ہوا۔ 17732روپے ماہوار آمدنی رکھنے والے گروپ کیلئے قیمتوں کے حساس اشاریہ میں ہفتہ وار بنیادوں پر 0.14فیصدکی کمی ہوئی، 17733روپے سے لے کر22888روپے ماہوار آمدنی والے گروپ کے لیے قیمتوں کے حساس اشاریے میں 0.17فیصد اضافہ ہوا۔ اسی طرح 22889روپے سے لے کر 29517روپے، 29518روپے سے لیکر 44175 روپے اور اس سے زیادہ ماہوارآمدنی رکھنے والے گروپوں کیلئے قیمتوں کے حساس اشاریہ میں بالترتیب 0.18فیصد، 0.20فیصد اور 0.16فیصد کا اضافہ ہوا۔ صارفین کیلئے قیمتوں کے حساس اشاریہ کا تعین ملک کے 17بڑے شہروں کی 50مارکیٹوں میں 51ضروری اشیا کی قیمتوں میں کمی بیشی کی بنیاد پر کیا جاتا ہے۔
اہم خبریں سے مزید