فرمان الہی
نماز کے اوقات
اسلام آباد(نیوزرپورٹر)وزیراعظم محمد شہباز شریف نے صنعت وزراعت کی ترقی کیلئے روشن معیشت بجلی پیکج کا اعلان کیا ہے جس کے تحت صنعتوں اور کسانوں کو آئندہ تین برسوں کے دوران 22 روپے 98پیسے فی یونٹ کی رعایتی قیمت پر اضافی بجلی فراہم کی جائے گی جبکہ شہبازشریف کا کہنا ہے کہ روشن معیشت بجلی پیکج کے تحت فراہم کی جانے والی بجلی کا بوجھ نہ تو گھریلو صارفین اور نہ ہی کوئی دیگر شعبہ اٹھائے گا‘صنعت و زراعت کے شعبے ترقی کریں گے تو ملک کو قرضوں سے نجات ملے گی۔ جمعرات کوشہباز شریف نے صنعتی و زرعی شعبے کے ماہرین و کاروباری برادری کے وفد سے ملاقات میں پیکج کا اعلان کیا ۔ وزیراعظم کے اعلان کردہ پیکج کے تحت صنعتوں اور کسانوں کو آئندہ تین سالوں (نومبر 2025 سے اکتوبر 2028) میں رعایتی قیمت پر اضافی بجلی فراہم کی جائے گی ۔وزیراعظم نے وفد سے گفتگوکرتے ہوئے کہا کہ صنعتی شعبے کو 34 روپے اور زرعی شعبے کو 38 روپے پر ملنے والے یونٹس کی قیمت کو خاطر خواہ کم کرکے اضافی یونٹس فراہم کیے جائیں گے،آئندہ تین برس میں پورا سال صنعتی و زرعی شعبے کو اضافی بجلی 22 روپے 98 پیسے فی یونٹ کی قیمت پر فراہم کی جائے گی،روشن معیشت بجلی پیکج کے تحت فراہم کی جانے والی بجلی کا بوجھ نہ تو گھریلو صارفین اور نہ ہی کوئی دیگر شعبہ اٹھائے گا۔
