فرمان الہی
نماز کے اوقات
کراچی (اسٹاف رپورٹر) ناقابل شکست پاکستان شاہینز نے سنسنی خیز ڈرامے کے بعد بنگلہ دیش کوفائنل ٹائی ہونے کے بعد سپر اوور میں شکست دے کر ریکارڈ تیسری بار ایشیا کپ رائزنگ اسٹارز کرکٹ ٹورنامنٹ جیت لیا۔ بنگلہ دیش اے کا پہلی بار ٹورنامنٹ جیتنے کا خواب پورا نہ ہوسکا۔ اتوار کی شب قطر کے دارالحکومت دوحا میں جیت کے ساتھ پاکستانی کھلاڑی سجدے میں چلے گئے اور گرائونڈ کا چکر لگایا۔ پی سی بی اور ایشین کرکٹ کونسل کے چیئرمین محسن نقوی نے فائنل دیکھا اور کھلاڑیوں میں انعامات تقسیم کئے۔ انہوں نے ٹیم کو مبارکباد دیتے ہوئے کہا کہ شاہینز نے حقیقت میں شاہینز کی طرح کھیلا ۔ فائنل میں بنگلہ دیش اے نے ٹاس جیت کر بولنگ کا فیصلہ کیا ۔ فاتح سائیڈ 125رنز بناکر آئوٹ ہوگئی جواب میں بنگلہ دیش نے بھی 9 وکٹ پر125رنز بنائے۔ فائنل ٹائی ہوگیا اور فیصلہ سپر اوور میں ہوا۔ پاکستان نے اس سے قبل اس نے 2019 اور 2023 میں یہ ٹورنامنٹ جیتا تھا جب یہ ایشیا کپ ایمرجنگ کہلاتا تھا۔ پاکستان شاہینز نے گروپ مرحلے میں عمان ، بھارت اے اور متحدہ عرب امارات کو شکست دی، سیمی فائنل میں سری لنکا اے کو ہرایا۔ پاکستان شاہینز کے سعد مسعود 3 چوکوں اور 3چھکوں کی مدد سے 38 ، عرفات منہاس نے 4چوکوں کی مدد سے 25، معاذ صداقت نے 2 چوکوں اور ایک چھکے کی مدد سے23رنز بنائے۔ انہوں نے اس ٹورنامنٹ میں مجموعی طور پر 258رنز اسکور کیے ۔ کپتان عرفان خان اور غازی غوری 9 ،9 رنز بناکر آؤٹ ہوئے۔ یاسرخان اور محمد فائق کوئی رن نہ بناسکے۔بنگلہ دیش کے ریپون موندول نے تین اور رقیب الحسن نے دو وکٹیں حاصل کیں۔ بنگلہ دیش اے کی اننگز میں حبیب الرحمن 26، ایس ایم مہروب 19 ، رقیب الحسن 24، عبدالغفار ثقلین 16اور رپون موندول نے 11 رنز بنائے ۔ سفیان مقیم نے 11 رنز دے کر 3، عرفات منہاس نے 5، احمد دانیال نے 11رنز دے کر دو، دو 2 جبکہ معاذ صداقت اور سعد مسعود نے ایک ایک کھلاڑی کو آؤٹ کیا۔ سپر اوور میں بنگلہ دیش اے احمد دانیال کی بولنگ پر دونوں وکٹیں گنواکر 6رنز بنانے میں کامیاب ہوسکی۔ شاہینز نے ہدف 4 گیندوں پر پورا کرلیا۔ سعد مسعود 5اور معاذ صداقت ایک رن پر ناٹ آؤٹ رہے۔ چیمپئن بننے پر شاہینز کو 20ہزار امریکی ڈالر بطور انعام ملے، جبکہ پاکستان شاہینز کے معاذ صداقت پلیئر آف دی ٹورنامنٹ قرار پائے۔
