• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پاکستان آئیڈل: گھر کی کفیل ایم فل طالبہ ماہم طاہر جیت کیلئے بے قرار

آج کا اخبار
اہم خبریں
29 نومبر ، 2025
کراچی (محمد ناصر)پاکستان آئیڈل میں گھر کی کفیل ایم فل طالبہ ماہم طاہر جیت کیلئے بے قرار، جیو سے گفتگو میں انہوں نے کہا کہ معمولی آمدنی کے باوجود خوابوں اور تعلیم پر کبھی سمجھوتہ نہیں کیا، استاد کے بغیر ریاضت کی،رحیم یار خان کی تحصیل خانپور سے تعلق رکھنے والی باصلاحیت نوجوان گلوکارہ ماہم طاہر نے اپنی سریلی آواز اور دلکش انداز سے ہر سننے والے کو متاثر کیا ہے۔ بچپن میں والد کا سایہ سر سے اُٹھ گیا، مگر انہوں نے ہمت، حوصلے اور لگن کا دامن کبھی نہیں چھوڑا۔ آج یہی آواز ان کی پہچان اور طاقت بن چکی ہے۔ ایم فل کی طالبہ ماہم طاہر نے مختلف کنسرٹس میں پرفارم کرکے نا صرف داد سمیٹی بلکہ اپنے فن کے ذریعے آمدن بھی حاصل کی۔ والد کے انتقال کے بعد گھر کی ذمہ داری ماہم اور ان کی والدہ کے کاندھوں پر آ گئی۔ محدود تنخواہ اور کم آمدن کے باوجود انہوں نے تعلیم اور خوابوں سے سمجھوتہ کرنے سے انکار کر دیا۔ ماہم نے ”جیونیوز“ سے گفتگو کرتے ہوئے کہا کہ مجھے گیت گانے کا شوق تھا، نعت خوانی بھی کرتی تھی، والد کو نعتیں سناتی جسے وہ بہت پسند کرتے تھے۔ خوشی نصیبی ہے کہ میں چھوٹے سے شہر سے میں نکل کر ”پاکستان آئیڈل“ کے بڑے اسٹیج تک آگئی ہوں اور اپنے شہر، گھر اور اساتذہ کی نمائندگی کررہی ہوں۔ دوسری طرف ماہم کے بھائی اور والدہ دونوں اپنی بیٹی کی کامیابی پر بے حد فخر کا اظہار کرتے ہیں۔ ”پاکستان آئیڈل“جیسے بڑے پلیٹ فارم پر ماہم طاہر ہر نئے گیت کے ساتھ اپنی صلاحیتوں کا لوہا منوا رہی ہیں اور سننے والوں کے دل جیت رہی ہیں۔ ”پاکستان آئیڈل“ کی نئی قسط ہفتے اور اتوار کی شب8بجے ”جیو ٹی وی“ سے نشر کی جائے گی۔
اہم خبریں سے مزید