• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

شہادت مسلمان کے لیے سب سے اعلیٰ اور مثالی موت ہے، سہیل آفریدی

میرا شہر
پشاور
17 دسمبر ، 2025
پشاور(جنگ نیوز)وزیراعلیٰ خیبر پختونخوا محمد سہیل آفریدی سے مئی 2025ء کے بھارتی بزدلانہ حملے میں خیبر پختونخوا سے تعلق رکھنے والے سکیورٹی فورسز کے شہداء کے ورثاء نے وزیراعلیٰ ہاؤس پشاور میں ملاقات کی۔ وزیراعلیٰ نے شہداء کے ورثاء کے لیے کابینہ سے منظور شدہ 50 لاکھ رقم میں 50 لاکھ مزید اضافے کا اعلان کیا ہے۔ اسی طرح مذکورہ بزدلانہ حملے میں خیبر پختونخوا سے تعلق رکھنے والے زخمی اہلکار کے لیے امدادی رقم دس لاکھ روپے سے بڑھا کر پچیس لاکھ روپے کرنے کا بھی اعلان کیا گیا۔ وزیراعلیٰ نے شہداء کے اہلخانہ سے گفتگو کرتے ہوئے کہا کہ خیبر پختونخوا حکومت شہداء کے خاندانوں کے ساتھ ہر قدم پر مکمل تعاون کے ساتھ شانہ بشانہ کھڑی ہے۔ انہوں نے کہا کہ خیبر پختونخوا کے عوام اور سکیورٹی فورسز کی لازوال قربانیاں ملک و قوم کی سلامتی کی ضمانت ہیں۔ وزیراعلیٰ نے کہا کہ حق کی راہ میں شہید کبھی نہیں مرتے اور شہادت مسلمان کے لیے سب سے اعلیٰ اور مثالی موت ہے۔ انہوں نے مزید کہا کہ شہداء ہمارا فخر ہیں اور خیبر پختونخوا حکومت ان کے ورثاء کا ہر ممکن خیال رکھے گی۔ اس موقع پر رکن قومی اسمبلی علی محمد خان، اراکین صوبائی اسمبلی احتشام علی، افتخار مشوانی اور عبدالسلام آفریدی بھی موجود تھے۔
پشاور سے مزید