فرمان الہی
نماز کے اوقات
کراچی ( اسٹاف رپورٹر) کے۔الیکٹرک نےسائٹ ایریا میں بجلی چوروں کے خلاف کارروائی کے نام پر صنعتوں کی بجلی بھی کاٹ دی۔ صنعت کاروں کو بجلی بندش کے باعث بھاری مالی نقصانات کا سامنا ہے،سائٹ ایسوسی ایشن آف انڈسٹری کراچی نے صنعتوں کی جانب سے 10 سے 15 روز سے بجلی کی عدم فراہمی کی شکایات پر کے الیکٹرک کی چیف ڈسٹری بیوشن، مارکیٹنگ اینڈ کمیونی کیشن آفیسر سعدیہ دادا کے ساتھ ایک اہم اجلاس منعقد کیا جس کا مقصد انہیں متاثرہ صنعتوں کو بجلی کی عدم فراہمی کے مسئلے پر تفصیلی تبادلہ خیال کرنا تھا۔ اس موقع پر کے الیکٹرک کے اعلیٰ حکام کے علاوہ ایسوسی ایشن کے صدر احمد عظیم علوی، چیف کوآرڈینٹر سلیم پاریکھ، نائب صدر محمد ریاض ڈھیڈھی، سابق صدور محمد کامران عربی، عبدالہادی،سابق سینئر نائب صدر سلیم ناگریا اور متاثرہ صنعتوں کے نمائندوں نے بھی شرکت کی۔سائٹ ایسوسی ایشن کے صدر احمد عظیم علوی نے کے الیکٹرک حکام کو آگاہ کیا کہ صنعتیں دو ہفتوں سے بجلی سے محروم ہیں اور اتنے طویل عرصے کیلئے متبادل انتظامات ممکن نہیں جس کے باعث صنعتوں کو شدید مشکلات اور بھاری مالی نقصانات کا سامنا ہے۔ اجلاس کے دوران صنعتکاروں نے اپنی شکایات سے الیکٹرک حکام کو آگاہ کیا۔ کے الیکٹرک حکام نے وضاحت کی کہ موجودہ بحران تکنیکی خرابی نہیں بلکہ دو صنعتی فیڈرز پر بڑے پیمانے پر بجلی چوری کے خلاف قانونی کارروائی کا نتیجہ ہے ۔
