فرمان الہی
نماز کے اوقات
مصر سے تعلق رکھنے والے فٹبالر محمد صالح نے تاریخی سنگِ میل عبور کر کے میسی اور رونالڈو کو پیچھے چھوڑ دیا۔
محمد صالح نے ایک شاندار بین الاقوامی اعزاز اپنے نام کر لیا۔ یہ سنگِ میل انہوں نے فٹبال کے عظیم کھلاڑیوں لیونل میسی اور کرسٹیانو رونالڈو سے بھی کم میچز میں حاصل کیا۔
محمد صالح اس وقت افریقہ کپ آف نیشنز (اے ایف کون) میں مصر کی نمائندگی کر رہے ہیں، جہاں انہوں نے ٹیم کو سیمی فائنل تک پہنچانے میں کلیدی کردار ادا کیا ہے۔
آئیوری کوسٹ کے خلاف سنسنی خیز کوارٹر فائنل مقابلے میں محمد صالح نے ایک نہایت اہم گول اسکور کیا، جس کے بعد مصر کے لیے ان کے مجموعی گول اور اسسٹ کی تعداد 100 ہو گئی۔
محمد صالح گزشتہ 15 برس سے مصر کی قومی فٹبال ٹیم کا اہم حصہ ہیں۔ انہوں نے مصر کے لیے 111 میچز کھیلے، جن میں 65 گول اسکور کیے اور 35 اسسٹ فراہم کیے، یوں ان کی مجموعی گول کنٹری بیوشن 100 تک پہنچ گئی۔
خیال رہے کہ لیونل میسی نے ارجنٹینا کےلیے یہ سنگِ میل 122 میچز جبکہ کرسٹیانو رونالڈو نے پرتگال کےلیے 136 میچز میں حاصل کیا تھا۔
یہاں یہ بھی واضح رہے کہ اس ریکارڈ تک سب سے تیزی سے پہنچنے کا اعزاز برازیلین لیجنڈ فٹبالر پیلے کے پاس ہے، جنہوں نے یہ کارنامہ 77 میچز میں انجام دیا، جبکہ نیمار نے 94 میچز میں یہ ہدف حاصل کیا۔
حال ہی میں ایک انٹرویو کے سبب 33 سالہ محمد صالح کو لیورپول کے مڈ ویک چیمپئنز لیگ میچ میں انٹر میلان کے خلاف فتح کے باوجود ٹیم سے باہر رکھا گیا تھا۔
