• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

عوامی مسائل کے حل تاخیر کسی صورت میں برداشت نہیں کی جائیگی، سید فخر جہاں

میرا شہر
پشاور
19 جنوری ، 2026
پشاور (خصوصی نامہ نگار) خیبر پختونخوا کے وزیر ایکسائز و ٹیکسیشن اور نارکوٹکس کنٹرول سید فخر جہان نے کہا ہے کہ صوبائی حکومت عوامی فلاح و بہبود، بنیادی سہولیات کی فراہمی اور علاقائی تعمیر و ترقی کے لئے ٹھوس اور مؤثر اقدامات کر رہی ہے، پاکستان تحریک انصاف کی صوبائی حکومت پارٹی منشور کے مطابق عوامی مسائل کے فوری اور پائیدار حل کو اپنی اولین ترجیح بنائے ہوئے ہے اور عوام کو ان کی دہلیز پر ریلیف فراہم کرنا حکومت کی ذمہ داری ہے، بانی چیئرمین عمران خان کے وژن کے تحت عوامی خدمت، شفاف طرزِ حکمرانی اور میرٹ کی بالادستی کو یقینی بنایا جا رہا ہے جبکہ وزیر اعلیٰ خیبر پختونخوا محمد سہیل آفریدی کی قیادت اور سرپرستی میں صوبائی حکومت صوبے بالخصوص پسماندہ اور دور افتادہ علاقوں کی ترقی، بنیادی ڈھانچے کی بہتری اور عوامی فلاحی منصوبوں پر عملی اقدامات کر رہی ہے۔ ان خیالات کا اظہار انہوں نے اپنے حلقہ نیابت پی کے 26 بونیر میں پبلک ڈے کے موقع پر کیا۔ صوبائی وزیر سے ان کی رہائش گاہ پر بونیر اور پی کے 26 سے تعلق رکھنے والے متعدد عوامی وفود نے ملاقاتیں کیں اور اپنے درپیش مسائل و معروضات پیش کئے۔ صوبائی وزیر نے متعدد مسائل کے فوری حل کیلئے متعلقہ محکموں اور افسران کو موقع پر ہی ضروری احکامات جاری کئے۔ انہوں نے اس بات پر زور دیا کہ عوامی مسائل کے حل میں غیر ضروری تاخیر کسی صورت برداشت نہیں کی جائے گی، کسی بھی سرکاری ادارے کی جانب سے عوامی خدمت اور فرائض منصبی کی ادائیگی میں غفلت یا کوتاہی ناقابل قبول ہے، کیونکہ سرکاری وقومی اداروں کا بنیادی مقصد عوام کی خدمت اور انہیں بروقت ریلیف فراہم کرنا ہے۔ انہوں نے متعلقہ حکام کو ہدایت کی کہ عوامی شکایات کے ازالے کو یقینی بنایا جائے اور حکومتی اقدامات کے ثمرات عام شہری تک پہنچائے۔
پشاور سے مزید