• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اسلام آباد میں 7 ر مضان بازاروں کا انعقاد کیا جائیگا؛ چیئرمین سی ڈی اے

میرا شہر
اسلام آباد
25 جنوری ، 2026
اسلام آباد (رانا غلام قادر) اسلام آ باد میں ماہ صیام میں 7ر مضان بازاروں کا انعقاد کیا جائے گا، شہر کے 3ہفتہ وار بازاروں کو بھی رمضان بازاروں میں تبدیل کیا جائے گا، رمضان بازار بہارہ کہو، پاکستان ٹاؤن ایکسپریس وے، اور ترنول کے مقام پر بھی قائم کئے جائیں گے جبکہ چیف کمشنر اسلام آباد و چیئرمین سی ڈی اے محمد علی رندھاوا نے ہدایت کی کہ رمضان بازاروں کیلئے بہترین انتظامات اور اشیاء کی کوالٹی و سرکاری نرخ پر دستیابی کو یقینی بنایا جائے۔  چیف کمشنر اسلام آباد و چیئرمین سی ڈی اے محمد علی رندھاوا کی زیر صدارت وفاقی دارالحکومت اسلام آباد میں رمضان المبارک کی تیاریوں کے حوالے سے اہم اجلاس منعقد ہوا جس میں ڈپٹی کمشنر اسلام آباد عرفان نواز میمن، چیف آفیسر ایم سی آئی ڈاکٹر انعم فاطمہ سمیت ضلعی انتظامیہ و سی ڈی اے کے سینئر افسران نے شرکت کی۔ اجلاس میں رمضان المبارک کے حوالے سے انتظامات سمیت رمضان بازاروں کے انعقاد اور اشیاء خوردونوش کی سرکاری نرخ پر فراہمی کو یقینی بنانے کے حوالے سے جائزہ لیا گیا۔ چیئرمین سی ڈی اے کو بریفنگ کے دوران بتایا گیا کہ رمضان بازاروں میں کیش اینڈ کیری اور مختلف کمپنیوں کے سٹالز لگائے جائینگے اور رمضان کے آخری عشرے میں عید الفطر کی مناسبت سے چاند بازار کا انعقاد بھی کیا جائیگا۔ چیف کمشنر اسلام آباد نے ہدایت کی کہ تمام رمضان بازاروں کو کیش لیس بنایا جائے تاکہ شہریوں کو آسان اور ڈیجیٹل ادائیگی کی بہترین سہولیات میسر آسکیں۔ انہوں نے رمضان بازاروں کی خوبصورتی اور صفائی ستھرائی کا خاص خیال رکھنے کی ہدایت بھی کی۔ چیئرمین سی ڈی اے نے متعلقہ اسسٹنٹ کمشنرز اور مجسٹریٹس کو رمضان بازاروں اور منڈیوں کا دورہ کرنے کی ہدایت کی۔ انہوں نے ہدایت کی کہ رمضان المبارک سے قبل رمضان بازاروں میں ضروری تعمیر و مرمت اور دیکھ بھال کا کام مکمل کیا جائے۔چیئرمین سی ڈی اے محمد علی رندھاوا نے کہا کہ رمضان بازاروں میں آرگینک اشیاء کی فروخت کیلئے مخصوص اسٹالز بھی مختص کئے جائیں۔ انہوں نے واضح ہدایت کی کہ رمضان المبارک میں اشیاء خوردونوش کے معیار پر کسی بھی قسم کا کوئی سمجھوتہ ہرگز نہیں کیا جائے گا۔
اسلام آباد سے مزید