فرمان الہی
نماز کے اوقات
پشاور (خصوصی نامہ نگار) خیبرپختونخوا حکومت کی منشیات کے خلاف زیرو ٹالرنس پالیسی اور صوبائی وزیر ایکسائز، ٹیکسیشن و نارکوٹکس کنٹرول سید فخر جہان کی ہدایات کی روشنی میں صوبہ بھر میں منشیات کے خلاف جاری کارروائیوں میں محکمہ ایکسائز و ٹیکسیشن اور نارکوٹکس کنٹرول نے ایبٹ آباد اور خیبر میں کارروائیاں عمل میں لائی ہیں جن میں بھاری مقدار میں منشیات قبضے میں لی گئی ہیں۔محکمہ ایکسائز کے جاری کردہ تفصیل کے مطابق ایکسائز انٹیلیجنس بیورو اور ایکسائز پولیس سٹیشن ایبٹ آباد کی جانب سے ضلع ایبٹ آباد میں کی گئی ایک مشترکہ کارروائی میں 342 کلوگرام چرس پکڑی گئی جبکہ ایک ملزم کو گرفتار کیا گیا اور سمگلنگ کیلئے استعمال کی جانے والی گاڑی بھی قبضےلی گئی۔دوسری کارروائی ضلع خیبر میں ایکسائز پولیس سٹیشن خیبر اور ایکسائز انٹیلیجنس بیورو کی جانب سے عمل میں لائی گئی جس میں 150 کلوگرام چرس قبضے میں لی گئی۔سمگلنگ کیلئے استعمال کی جانے والی سوزوکی گاڑی کو قبضے میں لیکر ایک ملزم کو گرفتار کیا گیا ہے۔ کارروائیاں پراونشل انچارج بیورو آف ایکسائز انٹیلیجنس سعود خان گنڈاپور اور ماجد خان ایکسائز اینڈ ٹیکسیشن آفیسر اینٹی نارکوٹکس کنٹرول کی زیر نگرانی ایس ایچ او تھانہ ایکسائز ایبٹ آباد ،ایس ایچ او تھانہ خیبر اور متعلقہ ٹیموں کے ذریعے عمل میں لائی گئیں۔صوبائی وزیر ایکسائز، ٹیکسیشن و نارکوٹکس کنٹرول سید فخر جہان نے انسدادِ منشیات کے حوالے سے ہدایات جاری کی ہیں کہ منشیات کی اسمگلنگ اور فروخت میں ملوث عناصر کے خلاف زیرو ٹالرنس پالیسی پر ہر صورت عملدرآمد یقینی بنایا جائے گا، منشیات کی لعنت میں ملوث عناصر کے خلاف سخت کارروائی عمل میں لائی جائے گی کیونکہ اس ناسور سے معاشرے اور نئی نسل کو ہم نے بچانا ہے۔ انہوں نے کہا کہ زیرو ٹالرنس پالیسی کے تحت منشیات کے ڈیلرز،سمگلرز،فروشان اور کاروبار کرنے والوں کے خلاف جاری آپریشن جاری رہے گا، منشیات کے خاتمے کے لئے تمام دستیاب وسائل بروئے کار لاتے ہوئے عوام کے جان و مال کے تحفظ اور نوجوان نسل کے محفوظ مستقبل کے لئے ہر ممکن قدم اٹھایا جائے گا۔
