فرمان الہی
نماز کے اوقات
گریٹر مانچسٹر پولیس نے وکٹوریہ پارک سینٹرل مسجد واقعہ میں ملوث دوسرا مشتبہ ملزم بھی گرفتار کر لیا۔
ذرائع کے مطابق دونوں ملزمان کو عدالت میں بھی پیش کیا گیا تھا۔
دوسری جانب تراویح کی نماز کے دوران مساجد پر تعینات پولیس اہلکاروں کو واپس بلا لیا گیا ہے، تاہم سیکیورٹی پلان کے دوسرے مرحلے میں پولیس گشت جاری ہے۔
مسجد کمیٹی کے چیئرمین حامد خان نے گفتگو کرتے ہوئے بتایا کہ وکٹوریہ پارک مسجد واقعہ کے بعد دونوں مشتبہ ملزمان کو ریمانڈ پر جیل بھیج دیا گیا ہے، ان میں سے ایک شخص پر ہتھیار رکھنے کے الزام میں مقدمہ درج کیا گیا ہے۔
انہوں نے بتایا کہ دوسرا ملزم پہلے سے کریمنل ریکارڈ یافتہ اور اس کے خلاف ثبوت موجود تھے۔ملزمان کے خلاف مقدمے کی سماعت تین ماہ جاری رہنے کا امکان ہے۔
ان کے مطابق اس وقت سب سے اہم بات یہ ہے کہ دونوں ملزم پولیس حراست میں ہیں۔ پولیس کی معلومات کے مطابق اس واقعے کے پیچھے کسی گروہ یا تنظیم کے ملوث ہونے کے شواہد نہیں ملے، تاہم پولیس اپنی تحقیقات جاری رکھے ہوئے ہے۔
مسجد کی سیکیورٹی کے حوالے سے حامد خان نے بتایا کہ مسجد میں پہلے بھی سیکیورٹی موجود ہوتی ہے، لیکن اب اسے مزید بڑھایا جائے گا اور زیادہ رضاکار تعینات کیے جائیں گے۔
انہوں نے کہا کہ پولیس نے یقین دہانی کرائی ہے کہ رمضان المبارک اور عید کے بعد تک مانچسٹر کی مساجد، خصوصاً سینٹرل مسجد کے اطراف میں پولیس کی موجودگی برقرار رہے گی۔
