فرمان الہی
نماز کے اوقات
کراچی(اسٹاف رپورٹر) جناح سندھ میڈیکل یونیورسٹی نے تعلیمی معیار اور جامع طرزِ حکمرانی کے فروغ کے عزم کا اعادہ کرتے ہوئے اپنی 39ویں اکیڈمک کونسل کے اجلاس میں متعدد اہم فیصلے کیے۔ یہ اجلاس وائس چانسلر پروفیسر امجد سراج میمن کی زیر صدارت منعقد ہوا، جس میں نصاب کو جدید تقاضوں سے ہم آہنگ کرنے اور جامعہ کے تعلیمی دائرہ کار کو وسعت دینے کے حوالے سے اہم اقدامات کی منظوری دی گئی۔ اجلاس کے آغاز میں گزشتہ اجلاس کی کارروائی کی توثیق کی گئی۔ اس کے بعد گورننس اور فیکلٹی ڈویلپمنٹ سے متعلق کئی اہم اقدامات کی منظوری دی گئی۔ ان میں "پروفیسر آف پریکٹس" کے عہدوں کے لیے باقاعدہ معیار مقرر کرنا شامل ہے تاکہ صنعت اور عملی میدان کے ماہرین کو تدریسی عمل میں شامل کیا جا سکے۔ اس کے علاوہ تدریسی کارکردگی کو سراہنے کے لیے ہائر ایجوکیشن کمیشن (HEC) کے بہترین استاد ایوارڈ کے معیار کو بھی اپنایا گیا۔ شفافیت اور احتساب کو مزید مضبوط بنانے کے لیے اہم تعلیمی عہدوں کے لیے باضابطہ جاب ڈسکرپشنز بھی منظور کی گئیں، جن کی بنیاد پر سالانہ کارکردگی کا جائزہ مقررہ کلیدی کارکردگی اشاریوں (KPIs) کے مطابق لیا جائے گا۔ تعلیمی توسیع کے سلسلے میں کونسل نے شعبہ سماجی علوم کے قیام اور جدید و علاقائی زبانوں کے آغاز کی منظوری دی۔
