فرمان الہی
نماز کے اوقات
اسلام آباد (خالد مصطفیٰ)پاکستان پر اقتصادی دباؤ بڑھنے کا خدشہ، پیٹرولیم قیمتوں میں اضافے سے مالی مشکلات شدید ہونے کا امکان، تیل کی بڑھتی قیمتیں، اقتصادی دباؤ، این ایف سی ایڈجسٹمنٹس میں تبدیلیوں کی تجویز،وفاق اور صوبے مل کر جامع پالیسی اپنائیں، 50فیصد تک بوجھ صارفین تک منتقل کیا جائے،ماہرین کا کہنا ہے کہ صوبوں کی جانب سے براہِ راست تعاون ،ریلیف کابوجھ بانٹا جانا چاہیے۔تخمینوں کے مطابق پاکستان کا تیل درآمدات کا بل 8 سے 9 ارب ڈالر تک بڑھ سکتا ہے، جو پہلے سے دباؤ کا شکار بیرونی کھاتوں پر مزید بوجھ ڈالے گا، ماہرین کا جامع حکمت عملی کی ضرورت پر زور؛ دو اور تین پہیوں والی گاڑیوں کیلئے ریلیف، چار پہیوں کیلئے قیمتوں میں اضافہ متوقع،صوبے براہِ راست تعاون ،ریلیف کابوجھ بانٹیں،تیل کی درآمدات کابل دوگنا ہوسکتا ہے، نامور ماہرِ معاشیات ثاقب شیرانی اوراو جی ڈی سی ایل کے سابق منیجنگ ڈائریکٹر، زاہد میر نے صوبوں سے براہ راست تعاون اور ریلیف کا بل بوجھ بانٹنے کا مطالبہ کیا ہے، انہوں نے متنبہ کیا کہ تیل کی قیمتوں میں اضافے سے تیل کی درآمدات کا بل دوگنا ہوسکتا ہے ،دریں اثناء حکومت کی اعلیٰ سطحی اجلاس کی تیاری؛ روپے کی مصنوعی قیمت برقرار رکھنے سے گریز، شرحِ تبادلہ میں بتدریج ایڈجسٹمنٹ کی سفارش، وزارتِ خزانہ کے حکام کے مطابق، وفاقی اور صوبائی حکومتوں کے درمیان ہونے والے مذاکرات میں ابھی تک کوئی اتفاقِ رائے پیدا نہیں ہو سکا ہے ۔ حکومت پر زور دیا کہ وہ امریکی ڈالر کے مقابلے میں روپے کی قدر کو مصنوعی طور پر برقرار رکھنے سے گریز کرےفصیلات کے مطابق ایران پر مشتمل جاری تنازع اور آبنائے ہرمز میں پیدا ہونے والی رکاوٹوں کے باعث عالمی سطح پر تیل کی بڑھتی ہوئی قیمتوں کے درمیان پاکستان کے معاشی چیلنجز میں شدید اضافے کا امکان ہے، جبکہ ماہرین خبردار کر رہے ہیں کہ پیٹرولیم کی طلب کو کم کرنے میں ناکامی ملک کی مالیاتی پوزیشن کو نمایاں طور پر خراب کر سکتی ہے۔ تخمینے بتاتے ہیں کہ پاکستان کا تیل کی درآمدات کا بل 8 سے 9 ارب ڈالر تک بڑھ سکتا ہے، جو پہلے سے دباؤ کا شکار بیرونی کھاتوں پر مزید بوجھ ڈالے گا۔ تجزیہ کاروں نے متنبہ کیا ہے کہ فوری طور پر طلب کے انتظام کے بغیر، اس کا اثر اس سے بھی زیادہ سنگین ہو سکتا ہے۔ وفاقی حکومت، جو کہ محدود مالی گنجائش کا سامنا کر رہی ہے، اس کے پاس اس بحران سے نمٹنے کے لیے کثیر جہتی حکمت عملی اپنانے کے علاوہ بظاہر بہت کم راستہ بچا ہے۔ گزشتہ تین ہفتوں کے دوران، اس نے عالمی منڈیوں میں شدید اضافے کے باوجود پیٹرولیم مصنوعات کی قیمتوں کو برقرار رکھتے ہوئے 125 ارب روپے کا ریلیف فراہم کر کے قیمتوں کے جھٹکوں کو خود برداشت کیا ہے۔ جغرافیائی و سیاسی تناؤ کی وجہ سے عالمی سطح پر ایندھن کی قیمتوں میں ہمہ جہت اضافہ ہوا ہے، جبکہ تنازع کے دورانیے کے حوالے سے غیر یقینی صورتحال برقرار ہے۔ صورتحال کو مزید پیچیدہ بناتے ہوئے، روس نے یکم اپریل سے 31 جولائی تک پیٹرول کی برآمدات پر عارضی پابندی کا اعلان کیا ہے، یہ ایک ایسا اقدام ہے جس سے عالمی سپلائی میں کمی اور قیمتوں میں مزید اضافے کی توقع ہے۔ پاکستان خاص طور پر اس لیے کمزور پوزیشن میں ہے کیونکہ یہ قیمتوں کے تعین کے لیے دبئی اور عمان کے بینچ مارکس (معیارات) پر انحصار کرتا ہے، جو اس وقت برینٹ کروڈ کی سطح سے نمایاں طور پر اوپر ٹریڈ کر رہے ہیں۔ جبکہ خام تیل کی قیمتیں 109 ڈالر فی بیرل کے قریب منڈلا رہی ہیں، دبئی بینچ مارکس تقریباً 135 ڈالر فی بیرل تک پہنچ چکے ہیں، جس سے پریمیم اور انشورنس (بیمہ) کے بعد پاکستان کے لیے درآمدی قیمت 145 ڈالر فی بیرل کے قریب پہنچ گئی ہے۔ ان دباؤ کے باوجود، حکومت نے عارضی طور پر صارفین کو (قیمتوں کے اثرات سے) محفوظ رکھا ہے۔ تاہم، حکام اعتراف کرتے ہیں کہ مالیاتی رکاوٹوں کے پیشِ نظر ایسے اقدامات طویل مدت کے لیے پائیدار نہیں ہیں۔ نامور ماہرِ معاشیات ثاقب شیرانی نے ایک جامع پالیسی ر عمل کا مطالبہ کیا ہے جس میں وفاقی اور صوبائی دونوں حکومتیں شامل ہوں۔ انہوں نے اس بات پر زور دیا کہ وفاقی اکائیوں کے درمیان اتفاقِ رائے کے بعد، این ایف سی ایڈجسٹمنٹس میں تبدیلیوں یا صوبوں کی جانب سے براہِ راست تعاون کے ذریعے ریلیف کے بوجھ کو بانٹا جانا چاہیے۔ شیرانی نے تجویز دی کہ پیٹرولیم مصنوعات کی قیمتوں میں ہونے والے اضافے کا 50 فیصد تک بوجھ صارفین تک منتقل کیا جائے، جبکہ بقیہ بوجھ کو کفایت شعاری کے اقدامات کے ذریعے سنبھالا جا سکتا ہے، جس میں غیر ضروری حکومتی اخراجات میں نمایاں کٹوتیاں شامل ہیں۔ انہوں نے ٹارگٹڈ ریلیف کے اقدامات کی بھی وکالت کی، خاص طور پر دو اور تین پہیوں والی گاڑیوں کے لیے، بشمول موٹر سائیکل، رکشہ، اور پبلک ٹرانسپورٹ کے حصوں اور رائیڈ ہیلنگ (ٹیکسی) سروسز کے لیے۔ ان کی سفارشات میں ایندھن کی راشننگ کا نظام متعارف کروانا اور پرانی گاڑیوں، موٹر سائیکلوں اور رکشوں کے لیے سستے ایندھن کے طور پر کم اوکٹین والے پیٹرول (RON-87) کا آغاز شامل ہے، جنہیں اعلیٰ درجے کے ایندھن کی ضرورت نہیں ہوتی۔
