• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ذیابطیس: جسم کے اہم اعضا کو نقصان پہنچانے والی بیماری

کل او پی ڈی میں کوئی 46-45سالہ خاتون اپنی بیٹی کے ساتھ آئیں ، خود تو ان کی طبیعت خراب تھی ہی، مگر بیٹی بھی بہت زیادہ پریشان تھی۔ وہ کمرے کے باہر زور، زور سے بول رہی تھی، داکٹر صاحبہ کو بلائیں، جلدی میری امی کو دیکھیں۔ میں کمرے سے باہر نکلی دوسرے مریض سے معذرت کرکے انہیں کمرے میں بلالیا، بیٹے کیا ہوا ہے امی کو؟

امی کی حالت خراب ہے، انہیں چکر آرہے ہیں، بہت کمزوری ہورہی ہے، ساری رات بار، بار پیشاب آتا ہے، پیاس بہت زیادہ لگتی ہیں۔ان کے ہاتھ پر معمولی سی چوٹ لگی تھی، دو ہفتے سے زیادہ ہوگیا ہے، یہ ٹھیک ہی نہیں ہورہی۔

خاتون کو چیک کیا، مزید ہسٹری لی، ٹیسٹ تجویز کیے اور ہاتھ پر پٹی کروائی اور آج وہ میرے سامنے رپورٹس کے ساتھ بیٹھی ہوئی تھیں۔ہمارا شک درست نکلا، ان کی رپورٹ میں شوگر کی مقدار بڑھی ہوئی تھی اور دوسرے ٹیسٹس بھی ذیابطیس کو ظاہر کررہے تھے، انہیں اطمینان سے سمجھایا اور ذیابطیس کا بتایا تو وہ بولیں میں تو میٹھا نہیں کھاتی اور نا ہی کوئی بیماری ہے ،تو پھر یہ شوگر کیسے ہوگئی؟ یہ سوال صرف ایک مریض کا نہیں بلکہ ان لاکھوں لوگوں کا ہے، جن کے سامنے بیماری کی علامات ہوتی ہیں، مگر وہ اسے عمر کا تقاضہ، تھکن یا عام کمزوری کا نام دے کر نظر انداز کردیتے ہیں۔

بین الاقوامی طبی اداروں کے مطابق پاکستان میں تقریباً 3.45 کروڑ افراد ذیابطیس کا شکار ہیں، عالمی درجہ بندی میں پاکستان ذیابطیس کے پھیلاؤ اور تناسب کے لحاط سے پہلے نمبر پر آنے والے ممالک میں شامل ہے۔ ہر 10 میں سے 3 افراد اس مرض کا شکار ہیں، عمر بڑھنے کے ساتھ اس مرض کا تناسب بھی بڑھتا ہے، جب کہ اب بچّوں اور نوجوانوں میں بھی یہ مرض تیزی سے پھیل رہا ہے۔

ذیابطیس بظاہر خاموش، مگر اندر ہی اندر جسم کے اہم اعضا کو نقصان پہنچانے والی بیماری ہے، یہ آنکھوں کی روشنی چھین سکتی ہے، گردوں کو ناکارہ بناسکتی ہے اور دل و دماغ کی شریانوں کو بھی متاثر کرسکتی ہے۔ ذیابطیس یا شوگربھی ایک ایسی بیماری ہے، جس کی ابتدا میں تشخیص نا ہو، تو وقت گزرنے کے ساتھ علاج میں مشکلات پیش آسکتی ہیں۔

یہ ایک دائمی بیماری ہے، جس میں خون میں گلوکوز/ شوگر کی مقدار معمول سے بڑھ جاتی ہے۔ ہمارے جسم کو توانائی حاصل کرنے کے لیے گلوکوز کی ضرورت ہوتی ہے، انسولین نامی ہارمون گلوکوز کو خون سے جسم کے خلیوں میں داخل ہونے میں مدد دیتا ہے اور خون میں شوگر کی مقدار کو کنٹرول کرتا ہے، انسولین ہمارے لبلبے میں تیار ہوتی ہے، اگر انسولین مناسب مقدار میں نا بنے یا جسم کے خلیے اس کے اثرات کے خلاف مزاحمت کرنے لگیں ،تو خون میں شوگر کی مقدار بڑھنے لگتی ہے، یہی کیفیت ذیابطیس کہلاتی ہے۔

ذیابطیس کی چنداہم اقسام ٹائپ ون ذیابطیس، ٹائپ ٹو ذیابطیس اور دوران ِحمل ہونے والی ذیابطیس شامل ہیں، ان میں ٹائپ ٹو ذیابطیس سب سے زیادہ عام ہے۔

ذیابطیس کسی ایک وجہ سے نہیں ہوتی بلکہ مختلف عوامل اس کے امکانات کو بڑھاتے ہیں، جن میں ٭موروثی عوامل، والدین یا قریبی رشتے داروں میں ذیابطیس ہو تو خطرہ بڑھ جاتا ہے٭ موٹاپا اور پیٹ کے گرد چرچبی زیادہ ہو، تو انسولین کے خلاف مزاحمت پیدا ہونے کا امکان بڑھ جاتا ہے٭جسمانی سرگرمی کی کمی، مسلسل بیٹھے رہنا، پیدل نہ چلنا اور ورزش نہ کرنا ذیابطیس کے خطرے میں اضافہ کرسکتا ہے۔ ٭غیر متوازن غذا مشروبات، مٹھائیاں، مرغب کھانے، غذائی بے اعتدالی وزن اور خون میں شوگر کے مسائل کو بڑھا سکتے ہیں۔٭ عمر اور کچھ سابقہ بیماریاں، عمر بڑھنے سے ذیابطیس کا خطرہ بڑھ سکتا ہے، تاہم نوجوان اور بچّے بھی اس کا شکار ہوسکتے ہی، بلند فشار خون بڑھا ہوا کولیسٹرول، پری ڈائیبٹیز اور حمل کے دوران ذیابطیس کی ہسٹری بھی اہم عوامل ہیں۔٭ ٹائپ ون ذیابطیس میں جسم کا مدافعتی نظام غلطی سے انسولین بنانے والے خلیوں کو نقصان پہنچاتا ہے۔٭ حمل کے دوران ذیابطیس میں ہارمونل تبدیلیوں کی وجہ سے خون میں شوگر کی مقدار بڑھ جاتی ہے، اس لیے باقاعدہ ٹیسٹ بھی ضروری ہوتے ہیں۔

علامات: ہر مریض میں علامات مختلف ہوسکتی ہیں، کچھ لوگوں میں واضح علامات ہوتی ہیں، جب کہ کچھ لوگ طویل عرصے تک بغیر کسی نمایاں علامت کے اس مرض میں مبتلا رہتے ہیں۔٭ بار، بار پیشاب آنا۔٭ زیادہ پیاس لگنا اور منہ کا خشک رہنا۔٭ زیادہ بھوک لگنے کے باوجود وزن کم ہونا۔٭ تھکاوٹ، کمزوری اور سستی محسوس کرنا۔٭ دھندلا نظر آنا، ٭ زخموں کا دیر سے ٹھیک ہونا۔٭ ہاتھوں اور پیروں میں سنسناہٹ، جلن یا بے چینی محسوس کرنا۔ HBA1Cکا ٹیسٹ گزشتہ دو سے تین ماہ کے دوران خون میں شوگر کی اوسط مقدار بتاتا ہے۔

ذیابطیس کے خطرات اور پیچیدگیوں کا جہاں تک تعلق ہے تو، آنکھوں کے مسائل، ذیابطیس آنکھ کے پردے کی خون کی نالیوں کو نقصان پہنچا سکتی ہے، جس سے نظر کی کمزوری اور شدید صورت میں بینائی کے ضائع ہونے کا خطرہ بھی ہوسکتا ہے۔

گردوں کے مسائل، مسلسل خون میں شوگر بڑھنے سے گردوں کی کارکردگی متاثر ہوسکتی ہے اور بعض حالتوں میں گردے فیل بھی ہوجاتے ہیں، دل اور فالج کا خطرہ،دل کی شریانوں کی بیماری، دل کے دورے اور فالج کے خطرے کو بڑھاتی ہے، خصوصاً جب بلڈ پریشر اور کولیسٹرول بھی زیادہ رہتا ہے۔

اعصابی اور پاؤں کے مسائل، ذیابطیس میں اعصاب Nerves متاثر ہوتے ہیں، اس وجہ سے ہاتھوں اور پاؤں کا سن ہونا ایک اہم مسئلہ ہے، اسی وجہ سے پاؤں میں ہونے والے معمولی زخم نظر سے اوجھل رہ جاتے ہیں او ربڑھ جانے کی صورت میں خطرناک شکل اختیار کرلیتے ہیں، جس میں سرجری کی ضرورت بھی پڑ سکتی ہے۔

اس کے علاوہ دانتوں اور مسوڑھوں کی بیماریاں اور بار بار انفیکشن جیسے مسائل بھی ہوسکتے ہیں۔ تاہم پیچیدگیوں کا خطرہ مناسب علاج اور احتیاط سے کم کیا جاسکتا ہے۔ جہاں تک علاج کا تعلق ہے تو ذیابطیس کا علاج مریض کی عمر، بیماری کی قسم، خون میں شوگر کی سطح اور دیگر بیماریوں اور مجموعی صحت کو مدنظر رکھ کر کیا جاتا ہے، مقصد صرف شوگر کی سطح کو کم کرنا نہیں بلکہ مستقبل کی پیچیدگیوں سے بھی مریض کو بچانا ہوتا ہے، جہاں تک ادویات کا تعلق ہے تو ہمیشہ ڈاکٹر کے مشورے سے استعمال کرنا چاہیئں۔ ٹائپ ٹو ذیابطیس میں ڈاکٹر شوگر کم کرنے والی ادویات تجویز کرتے ہیں اور بعض مریضوں کو انسولین کی ضرورت بھی ہوتی ہے۔

ٹائپ ون ذیابطیس میں انسولین زندگی کے لیے ضروری ہے، انسولین یا تجویز کردہ کوئی بھی دوا خود سے بند یا کم زیادہ کرنا خطرناک ہوسکتا ہے۔ 2۔ متوازن غذا، کھانے کے اوقات میں باقاعدگی رکھنا چاہیے، غذا میں پرہیز بہت ضروری ہے۔ روزانہ کی خوراک میں سبزیاں، دالیں، ثابت اناج اور مناسب مقدار میں پروٹین شامل ہونا چاہیے۔

ذیابطیس کو صرف میٹھا کھانے کی بیماری نا سمجھیں اور ناہی اس کے علاج کے لیے غیر مستند نسخوں اور ٹوٹکوں پر انحصار کریں، ذیابطیس کے لیے خاندان، معاشرے اور صحت کے مراکز کو مل کر آگہی پیدا کرنا ہوگی، اس کے لیے میڈیا کو بھی اپنا کردار ادا کرنا ہوگا، بیماری سے لڑنے کا سب سے موثر طریقہ بروقت آگہی، درست تشخیص احتیاط، مناسب علاج اور صحت مند طرز زندگی ہے، اسی لیے ’’ذیابطیس کو قابو میں رکھیئے زندگی کو نہیں۔‘‘

صحت سے مزید