نواز شریف کی ہدایت پر مری میں پانی کے بحران کے حل کیلئے جامع منصوبہ

انصار عباسی

اسلام آباد … پاکستان مسلم لیگ (ن) کے قائد میاں نواز شریف کی ذاتی دلچسپی کے بعد پاکستان کے معروف پہاڑی تفریحی مقام مری میں طویل عرصے سے جاری پانی کی کمی کو دور کرنے کے لیے ایک جامع آبی حکمتِ عملی تیار کر لی گئی ہے جو پہلے ہی عملدرآمد کے مرحلے میں ہے۔ پنجاب حکومت کے حکام کا کہنا ہے کہ مری ڈویلپمنٹ پروگرام (ایم ڈی پی) کے واٹر سپلائی جزو کے ذریعے پانی کی دستیابی میں پہلے ہی دگنا سے زیادہ اضافہ ہو چکا ہے۔ آئندہ مالی سال میں اربوں روپے مختص کیے جا رہے ہیں تاکہ مری کے تمام علاقوں میں پانی کی کمی کو دور کیا جا سکے۔ ایک سینئر افسر کے مطابق میاں نواز شریف نے کہا: "میں اس مسئلے کو حل کرنے کے لیے جو کچھ بھی کر سکتا ہوں کروں گا۔" اس دوران ڈپٹی کمشنر مری ظہیر شیرازی نے اس نمائندے کو بتایا کہ حکومتی اقدامات کے نتیجے میں شہری علاقوں میں روزانہ پانی کی فراہمی کے اوقات میں پہلے ہی بہتری آئی ہے۔ انہوں نے بتایا کہ آئندہ مالی سال میں کئی بڑے منصوبے شروع کیے جائیں گے تاکہ پہاڑی علاقے کے شہری اور دیہی دونوں حصوں کے لیے طویل المدتی آبی تحفظ یقینی بنایا جا سکے۔ ظہیر شیرازی کا کہنا تھا مری جہاں ہر سال لاکھوں سیاح آتے ہیں، کئی برسوں سے شدید پانی کے بحران کا شکار تھا۔ ایم ڈی پی کے اقدامات سے پہلے شہری علاقوں میں پانی کی دستیابی صرف 1.1 ملین گیلن یومیہ (ایم جی ڈی) تھی جبکہ اندازاً طلب 4.4 ایم جی ڈی تھی، جس سے 3.3 ایم جی ڈی کی کمی پیدا ہو رہی تھی۔ اہم منصوبوں کے نفاذ کے بعد پانی کی دستیابی بڑھ کر 2.85 ایم جی ڈی ہو گئی ہے، یعنی نظام میں 1.75 ایم جی ڈی کا اضافہ ہوا ہے۔ نتیجتاً پانی کا خسارہ 3.3 ایم جی ڈی سے کم ہو کر 1.55 ایم جی ڈی رہ گیا ہے، جبکہ مجموعی طور پر پانی کی دستیابی میں تقریباً 159 فیصد اضافہ ہوا ہے۔ ڈپٹی کمشنر نے کہا کہ شہر کو ابھی بھی مجموعی طلب پوری کرنے کے لیے اضافی پانی درکار ہے، تاہم وہ رہائشی جو پہلے روزانہ تقریباً ایک گھنٹہ پانی حاصل کرتے تھے، اب انہیں پانچ سے سات گھنٹے پانی کی فراہمی مل رہی ہے، جس سے گھریلو اور کاروباری شعبوں پر دباؤ کم ہوا ہے، خاص طور پر سیاحت کے عروج کے موسم میں۔ انہوں نے بتایا کہ یہ پیش رفت بحالی اور توسیعی منصوبوں کے امتزاج سے حاصل ہوئی ہے۔ ایم ڈی پی فیز ون کے تحت پانچ اہم واٹر سپلائی اسکیمیں جن میں مسوٹ، ڈونگا گلی، دھڑ جاوا، خنیتک اور کشمیر پوائنٹ شامل ہیں، بحال کی گئیں جن کے ذریعے بنیادی ڈھانچے کی بہتری، ذرائع کی اپ گریڈیشن اور آپریشنل کارکردگی میں اضافہ کر کے مزید 0.90 ایم جی ڈی پانی حاصل کیا گیا۔ اسی دوران پبلک ہیلتھ انجینئرنگ ڈیپارٹمنٹ نے نئی واٹر سپلائی اور پمپنگ انفراسٹرکچر کے ذریعے مزید 0.85 ایم جی ڈی کا اضافہ کیا۔ اس میں ڈونگا گلی واٹر سپلائی اسکیم شامل ہے جس نے 29 کلومیٹر ٹرانسمیشن پائپ لائن اور پمپنگ سہولیات کی بحالی کے ذریعے 766.7 ملین روپے کی لاگت سے 0.25 ایم جی ڈی کا اضافہ کیا، اور دھڑ جاوا واٹر سپلائی اسکیم جس نے نئے پانی کے ذرائع اور پمپنگ انفراسٹرکچر کے ذریعے 717.4 ملین روپے کی لاگت سے 0.60 ایم جی ڈی کا اضافہ کیا۔ ڈپٹی کمشنر کے مطابق اگلے مالی سال میں دیہی مری کے لیے اربوں روپے کا آبی منصوبہ نافذ کیا جائے گا۔ انہوں نے کہا کہ ہر یونین کونسل کو مقامی آبادی کے لیے متعدد واٹر سپلائی اسکیمیں فراہم کی جائیں گی۔ حکام کا کہنا ہے کہ موجودہ اقدامات مری کے پانی کے نظام کی 1986 کے بعد سب سے بڑی جدید کاری کی نمائندگی کرتے ہیں، جبکہ نیٹ ورک کے کچھ حصے 1923 کے دور سے تعلق رکھتے ہیں۔ یہ پروگرام اب اپنے اگلے مرحلے میں داخل ہو رہا ہے۔ ایم ڈی پی فیز ٹو میں مجموعی طور پر 23 مزید واٹر سپلائی اسکیمیں شامل کی گئی ہیں جن کی لاگت 920 ملین روپے ہے، یعنی ہر اسکیم کی اوسط لاگت تقریباً 40 ملین روپے بنتی ہے۔ ان منصوبوں سے تقسیم کے نظام کو مزید مضبوط بنانے، قابلِ اعتماد فراہمی بڑھانے اور مسلسل کمی کا شکار علاقوں میں رسائی بڑھانے کی توقع ہے۔ روایتی انفراسٹرکچر کے ساتھ ساتھ انتظامیہ نے بارش کے پانی کو محفوظ کرنے کے لیے رین واٹر ہارویسٹنگ انیشی ایٹو بھی شروع کیا ہے تاکہ روایتی ذرائع پر انحصار کم کیا جا سکے اور موسمیاتی مزاحمت کو بہتر بنایا جا سکے۔ فیز ون کے تحت جو پہلے ہی مکمل ہو چکا ہے، 1,100 گھریلو یونٹس نصب کیے گئے جن سے 14 ملین لیٹر ذخیرہ کرنے کی گنجائش پیدا ہوئی۔ فیز ٹو، جس کی تکمیل ستمبر 2026 تک ہدف ہے، مزید 1,785 گھروں اور 100 سرکاری عمارتوں کو شامل کرے گا، یعنی مجموعی طور پر 1,885 مقامات۔ فیز تھری جس کی منظوری دسمبر 2028 تک کے نفاذ کے لیے دی گئی ہے، 10,000 گھروں، 800 سرکاری عمارتوں اور 20 کمیونٹی واٹر سپلائی اسکیموں تک توسیع کرے گا، یعنی مجموعی طور پر 10,820 مقامات، اور اس کے ذریعے سالانہ تقریباً 238 ملین گیلن بارش کے پانی کو محفوظ کرنے کی صلاحیت پیدا ہوگی۔ تاہم حکام کا خیال ہے کہ مری کے مستقبل کے لیے سب سے اہم منصوبہ مجوزہ بلک واٹر سپلائی اسکیم ہوگی جس کی فزیبلٹی اسٹڈی 30 اپریل 2026 کو مکمل ہو چکی ہے۔ اس اسکیم سے موجودہ 2.85 ایم جی ڈی فراہمی میں 2.80 ایم جی ڈی کا اضافہ متوقع ہے، جس سے پانی کی مجموعی دستیابی 5.65 ایم جی ڈی تک پہنچ جائے گی۔ اگر یہ منصوبہ مکمل طور پر نافذ ہو جاتا ہے تو یہ نہ صرف 4.4 ایم جی ڈی کی موجودہ طلب کے مقابلے میں پانی کی کمی ختم کر دے گا بلکہ تقریباً 1.25 ایم جی ڈی کا اضافی ذخیرہ بھی پیدا کرے گا، جو مستقبل کی آبادی اور سیاحت کی بڑھتی ہوئی ضروریات کے لیے اہم بفر فراہم کرے گا۔