آزاد کشمیر کی حکومت ایل او سی توڑنے والوں کو سہولتیں دے، شاہد اقبال

آج کا اخبار

یورپ سے

08 اکتوبر ، 2019

وٹفورڈ (نمائندہ جنگ) جموں کشمیر ہیومن رائٹس موومنٹ کے چیئرمین پروفیسر شاہد اقبال نے میڈیا سے بات چیت کرتے ہوئے کہا کہ آزاد کشمیر کی حکومت کنٹرول لائن توڑنے والے لاکھوں کشمیریوں کو سہولیات مہیا کرے۔ یہ ہمارے بھائی ہیں جو کشمیر کی آزادی اور مقبوضہ کشمیر میں جاری مظالم کے خلاف آواز بلند کرنے کے لئے اٹھ کھڑے ہوئے ہیں ۔ آج دو ماہ ہوچکے مقبوضہ کشمیر میں مسلسل کرفیو لگا ہوا ہے وزیراعظم پاکستان عمران خان کی تقریر جو انہوں نے اقوام متحدہ میں کی اس کے باوجود عالمی برادری نے مسئلہ کشمیر پر کوئی توجہ نہیں دی۔ انہوں نے وزیراعظم پاکستان عمران خان اور وزیراعظم آزاد کشمیر سے مطالبہ کیا کہ وہ اقوام متحدہ اور یو این سیکورٹی کونسل سے مطالبہ کریں کہ وہ آزادی مارچ کرنے والوں کو بحفاظت کنٹرول لائن کراس کرنے کے لئے اقوام متحدہ اقدامات کرے۔ کشمیر کے دونوں اطراف کشمیریوں کے خاندان آباد ہیں بھارت کا موقف غلط ھے وہ ریاست کے باشندے ہیں اور مل سکتے ہیں ۔ان پر پابندیاں نہیں لگائی جا سکتیں ۔ پروفیسر شاھد اقبال نے کہا وزیراعظم آزاد کشمیر راجہ فاروق حیدر، ممبران اسمبلی آزاد کشمیر ، وزرا چکوٹھی سے آزادی مارچ کرنے والوں سے ملاقات کریں ان کی حوصلہ افزائی کرنے کے لئے ان کو ضروریات زندگی مہیا کریں۔ ملک اللہ دتہ نے کہا بھارت آزادی مارچ والوں کے لئے بارڈر کے لئے کھول دے ۔ آزاد کشمیر کے عوام اور مقبوضہ کشمیر کے عوام ایک ہیں ۔انہوں نے کہا آزادی مارچ میں شامل عوام اپنے ہاتھوں اقوام متحدہ کے جھنڈے رکھیں تاکہ عالمی برادری کشمیر کی متنازع حیثیت سے آگاہ ہو سکے ۔کونسلر عمران حمید ملک نے کہا کشمیر ی عوام کشمیر کی آزادی کے لیے اپنی زمین استعمال کر رہے ہیں۔ انہوں نے وزیراعظم پاکستان عمران خان کی تقریر پر کہا کہ وہ کشمیر ی عوام کو بتائیں کشمیر ی عوام کو کیا کر نا چاہیے ۔اب تو بھارت کشمیر کومزید چار حصوں میں تقسیم کرنا چاہتا ھے۔انجینئر عثمان نے کہا وزیراعظم پاکستان عمران خان ایک جرأت مند لیڈر ہیں وہ مسئلہ کشمیر کے حل کے لیے دورہ چین کے موقع پر کشمیر کے مسئلے کو زیر بحث ضرور لائیں ۔ وٹفورڈ کمیونٹی فورم کے چیئرمین امجد امین بوبی نے کہا کہ وزیراعظم پاکستان عمران خان اس مسئلے پر اقوام متحدہ کے سے رجوع کریں ۔

تازہ ترین