ماں نے کہا تھا کہ اس میچ میں تم سنچری بناؤ گے، فواد عالم

23 اگست ، 2021

جمیکا ٹیسٹ میں شاندار سنچری اسکور کرنے والے قومی کرکٹ ٹیم کے بیٹسمین فواد عالم کا کہنا ہے کہ والدہ نے میچ سے پہلے کہا تھا کہ آج تم سینچری بناؤ گے، اللّٰہ جب دیتا ہے چھپڑ پھاڑ کر دیتا ہے۔

انہوں نے کہا کہ آج کی سنچری اپنے والدین کے نام کرتا ہوں، میچ سے پہلے والدہ سے فون پر بات ہوئی تھی، والد کی بھی خواہش تھی کہ ویسٹ انڈیز میں سنچری اسکور کروں، ماں کی دعا ساتھ ہو تو ہر مشکل آسان ہوجاتی ہے۔

فواد عالم نے کہا کہ ہمیشہ اپنے والد سے متاثر ہوا ہوں، زندگی میں اونچ نیچ چلتی رہتی ہے مگر میرے والد نے ہمیشہ حوصلہ بڑھایا، خوش قسمت ہوں کہ مشکل وقت میں میرے اہلخانہ نے ہمیشہ مجھے حوصلہ دیا، والد ہمیشہ کہتے تھے کہ لگے رہو تمہارا وقت ضرور آئے گا۔

ویسٹ انڈیز کے خلاف دوسرے ٹیسٹ میں سنچری بنانے پر فواد عالم کا کہناہے جمیکا کی وکٹ آسان تھی نہ موسم، میچ کے پہلے روز گرمی اور حبس بہت زیادہ تھا، ٹیسٹ کے چوتھے دن ویسٹ انڈیز کو کم سے کم رنز پر آؤٹ کردیا تو میچ جیتنے کی پوزیشن میں ہوں گے۔

انہوں نے کہا کہ پانچ مختلف ممالک میں سنچریاں بنانے پر اللہ کا شکر ادا کرتا ہوں، اللہ جب دیتا ہے چھپڑ پھاڑ کر دیتا ہے۔

فواد عالم نے سنچری اسکور کرنے پر اپنے مخصوص جشن کے اسٹائل کے حوالے سے کہا کہ یہ اسٹائل ترکش ڈرامہ ارطغرل غازی سے متاثر ہوکر اپنایا ہے، اس اسٹائل کو اظہر علی کے ساتھ طے کیا تھا۔

انہوں نے بتایا کہ اظہر علی اور میں نے سنچری بنانے پر یہ اسٹائل اپنانے کا فیصلہ کر رکھا ہے۔

دوسری جانب جمیکا ٹیسٹ کے تیسرے روز پاکستان نے اپنی پہلی اننگز 9 کھلاڑی آؤٹ 302 رنز پر ڈکلیئر کردی۔

دوسرے ٹیسٹ کے پہلے دن ریٹائرڈ ہرٹ ہونے والے فواد عالم نے کیریئر کی پانچویں سنچری بنائی، وہ 124 رنز بنا کر ناٹ آؤٹ رہے۔

پاکستان کی جانب سے بابراعظم 75، محمد رضوان 31 اور فہیم اشرف 26 رنز بنا کر نمایاں رہے۔

ویسٹ انڈیز کی طرف سے کیماروچ اور جیڈن سیلز نے 3، 3 کھلاڑیوں کو آؤٹ کیا جبکہ جیسن ہولڈر کے حصے میں 2 وکٹیں آئیں۔

302 رنز کے جواب میں تیسرے دن کے اختتام پر ویسٹ انڈیز کے 39 رنز پر 3 کھلاڑی آؤٹ ہوگئے ہیں، دو وکٹیں شاہین شاہ آفریدی نے لیں جبکہ ایک کھلاڑی کو فہیم اشرف نے آؤٹ کیا۔

تازہ ترین