اسلام آباد (نمائندہ جنگ) پاکستان نے بھارتی شہر اودے پور میں مبینہ ہندو درزی کے قتل کے ملزمان کا پاکستانی تنظیم کے ساتھ تعلق جوڑنے کے بھارتی الزامات کو واضح طور پر مسترد کر دیا۔ بدھ کو دفتر خارجہ نے ایک بیان میں بتایا کہ بھارتی میڈیا کے ایک حصے میں رپورٹس دیکھی ہیں جن میں ملزمان کو پاکستان کی ایک تنظیم سے جوڑنے کی کوشش کی گئی ہے۔ ہم ایسے کسی بھی الزام کو مسترد کرتے ہیں۔یہ بی جے پی آر ایس ایس کے ہندوتوا نظریے کے تحت بھارتی حکومت کی پاکستان کو بدنام کرنے کی روایتی کوشش ہے، وہ پاکستان پر انگلیاں اٹھا کر اپنے اندرونی مسائل سے توجہ ہٹانا چاہتا ہے، اس طرح کی بدنیتی پر مبنی کوششیں بھارت یا بیرون ملک لوگوں کو گمراہ کرنے میں کامیاب نہیں ہوں گی۔