فرمان الہی
نماز کے اوقات
کراچی (ٹی وی رپورٹ) قومی اسمبلی میں قائد حزب اختلاف اور مسلم لیگ (ن) کے صدر میاں شہباز شریف نے کہا ہے کہ عمران خان سے بات کرنے کا سوال ہی پیدا نہیں ہوتا، ایسا شخص جو اناپرست ہے، دن رات جھوٹ بولتا ہے، اس سے بات نہیں ہوسکتی، اتوار کو عمران خان کا ذہنی مرض مزید بڑھائیں گے، عمران خان پریشان نہ ہوں، آنے والے دنوں میں وہ نہیں ہم اسے سرپرائز دیں گے ، مدینہ کی ریاست کی بات کرنے والوں کو اپنے گریبان میں جھانکنے کی ضرورت ہے، جادو کیخلاف اسلام میں سختی سے تنبیہ کی گئی ہے لیکن بنی گالا میں مرغی کا منوں گوشت جلایا جاتا ہے کھلایا نہیں جاتا۔ ان خیالات کا اظہار انہوں نے ایک انٹرویو میں کیا۔ اپوزیشن لیڈر نے گفتگو کرتے ہوئے مزید کہا کہ متحدہ اپوزیشن نے عوامی مطالبے پر تحریک عدم اعتما دپیش کی ہے اور تحریک عدم اعتماد ہر حوالے سے کامیاب ہوگی،پاکستان کے22کروڑ عوام کو ایک انتہائی نااہل، ناتجربہ کار اور کرپٹ حکومت سے چھٹکارا حاصل ہوجائے گا۔اسپیکرقومی اسمبلی آئین سے انحراف کے مرتکب ہوچکے انہیں14 دن میں اجلاس بلانا تھا انہوں نے نہیں بلایا جبکہ کوئی وجہ نہیں تھی کہ وہ اجلاس نہ بلاتے۔ہارس ٹریڈنگ سے قبل انہیں اپنے گریبان میں جھانکنا چاہئے۔
