فرمان الہی
نماز کے اوقات
کراچی (اسٹاف رپورٹر) چند سال سے ملک میں کلب کرکٹ ملک میں عملی طور پر ختم ہوچکی تھی اب پاکستان کرکٹ بورڈ نے کلب کرکٹ کی بحالی کا دعویٰ کیا ہے ۔ پی سی بی کے مطابق سیزن 22-2021 میں چھ کرکٹ ایسوسی ایشنز نے پی سی بی کے اشتراک سے مجموعی طور پر 7009 میچز منعقد کرائے گئے۔ جن میں 3822 کرکٹ کلبز نے شرکت کی۔ اس دوران تمام کرکٹ ایسوسی ایشنز نے اپنی کرکٹ لیگز کروائیں، جو اکتوبر 2021 سے فروری 2022کے درمیان کھیلی گئیں۔ واضح رہے کہ نئے نظام کے آنے کے بعد تقریباً تین سال سے پاکستان میں کلب کرکٹ نہ ہونے کے برابر تھی ۔ پی سی بی کے مطابق خیبر پختون خوا کرکٹ ایسوسی ایشن کے اعداد و شمار سب سے بہترین رہے، جہاں کرکٹ لیگ میں 844 کلبز کے مابین 1530 میچز کھیلے گئے۔ سینٹرل پنجاب اور سندھ میں بالترتیب 788 اور 670کرکٹ کلبز نے شرکت کی۔ سینٹرل پنجاب میں 1482جبکہ سندھ میں 1172 میچز کھیلے گئے۔ سدرن پنجاب میں1100 میچز میں 517 کلبز نے شرکت کی۔ بلوچستان اور ناردرن میں 512 اور 491 کرکٹ کلبز میں بالترتیب 700 اور 1025 میچز کھیلے گئے۔ بلوچستان، سینٹرل پنجاب، ناردرن، سندھ اور سدرن پنجاب میں کرکٹ لیگز 20 اکتوبر 2021 سے شروع ہوئی تھیں۔ ڈائریکٹر ہائی پرفارمنس ندیم خان کا کہنا ہے کہ ڈومیسٹک کرکٹ میں کلب کرکٹ کا کردار بہت اہم ہے، لہٰذا انہوں نے چھ کرکٹ ایسوسی ایشنز میں گراس روٹ کرکٹ کے فروغ کے لیے ہر ممکن تعاون کیا۔ پی سی بی آئندہ بھی نوجوان اور باصلاحیت کھلاڑیوں کو بہترین مواقع فراہم کرنے کیلئے تمام چھ کرکٹ ایسوسی ایشنز کے ساتھ مل کر آگے بڑھنے کا خواہشمند ہے۔ کلب کی سطح پر کھیل کی ترقی کے لئے پی سی بی آئندہ چند ماہ سکروٹنی کا ایک آزاد عمل جاری رکھنے کا اعلان کرچکا ہے۔ اس کے علاوہ خیبر پختون خواہ، سینٹرل پنجاب اور سدرن پنجاب میں اسکول کرکٹ لیگز کے انعقاد کے ذریعے اسکول کے بچوں کو بھی کھیل کے دھارے میں لانے کی کوشش کی گئی ہے۔ اس سلسلے میں صرف خیبر پختونخواہ میں اسکولز کی 300 ٹیموں نے شرکت کی۔ 7 اکتوبر سے 8 نومبر تک جاری رہنے والی اس لیگ میں 565 میچز کھیلے گئے۔ سدرن پنجاب اسکولز لیگ میں 184 ٹیموں کے مابین 295 میچز کھیلے گئے۔ یہ ٹورنامنٹ 15 نومبر 2021 سے 5 جنوری 2022 تک جاری رہی۔سینٹرل پنجاب کی اسکولز لیگ میں 162 اسکولز کے درمیان اب تک 458 میچز کھیلے جاچکے ہیں۔ یہ ٹورنامنٹ اب بھی جاری ہے۔
