• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سلمان آغا، شان کی دورئہ نیدرلینڈز کیلئے کرکٹ ٹیم میں شمولیت متوقع

آج کا اخبار
اسپورٹس
01 اگست ، 2022
کراچی (اسٹاف رپورٹر) نیدر لینڈ کیخلاف ون ڈے سیریز کیلئے پاکستانی کرکٹ ٹیم کا اعلان منگل کو متوقع ہے۔ ٹیم میں شان مسعود اور سلمان علی آغا کو شامل کیا جاسکتا ہے البتہ وکٹ کیپر سرفراز احمد کی شمولیت کا کوئی امکان نہیں ہے، انہیں کشمیر پریمیئر لیگ کیلئے این اوسی جاری کردیا گیا ہے۔ پی سی بی نے سری لنکا سے واپسی پر شان مسعود اور سلمان آغا کا ویزہ حاصل کیا ہے۔ شان مسعود کو ڈاربی شائر کائونٹی کی نمائندگی کرنے انگلینڈ جانا ہے ۔ وہ لاہور کے ہائی پرفارمنس سینٹر میں مقیم ہیں ۔ محمد رضوان کے ساتھ محمد حارث کو وکٹ کیپر کی حیثیت سے ٹیم میں شامل کیا جائے گا۔ ذرائع کے مطابق ٹیم کی مسلسل مصروفیت کے پیش نظر فاسٹ بولر شاہین شاہ آفریدی کو آرام دیا جائے گا تاکہ وہ مکمل فٹ ہوکر ایشیا کپ میں ایکشن میں دکھائی دیں ۔ روٹرڈم روانگی سے قبل تربیتی کیمپ چھ سے گیارہ اگست تک لاہورمیں لگےگا، تمام کھلاڑی پانچ اگست کونیشنل ہائی پرفارمنس سینٹرلاہور میں رپورٹ کریں گے۔ قومی اسکواڈ بارہ اگست کو لاہور سے نیدرلینڈزروانہ ہوگا، دونوں ٹیموں کےدرمیان تین ون ڈےمیچز کی سیریزسولہ اگست سےشروع ہوگی۔ تین ون ڈے میچز ورلڈ کپ سپر لیگ کا حصہ ہیں ۔
اسپورٹس سے مزید