• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

راولپنڈی ،جلوسوں کی سیکیورٹی اور ٹریفک روانی کیلئےخصوصی انتظا مات

میرا شہر
اسلام آباد
09 اکتوبر ، 2022
راولپنڈی( سٹاف رپورٹر) آج 12ربیع الاول میلاد النبی ؐکے مبارک موقع پر جلوسوں کی سکیورٹی اور شہریوں کی سہولت کے لیے ٹریفک پولیس کے 530اہلکار جبکہ مرکزی جلوس سمیت 123 جلوسوں کی سکیورٹی کے لیے راولپنڈی پولیس کے 5ہزار 800 افسران اوراہل کار ڈیوٹی سرانجام دیں گے۔راولپنڈی ٹریفک پولیس نے جشن میلاد النبیﷺکے لیے ٹریفک پلان جاری کیاہے جس کے مطابق عید میلاد النبیؐ کے موقع پر دو مرکزی جلوس نکالے جائیں گے جن میں ایک جلوس جامع مسجد حنفیہ جامع مسجد روڈ سے 10بجے صبح بر آمد ہو گا جو شہر کے مختلف راستوں پل شاہ نذر،بنی چوک ، مری روڈ ،کمیٹی چوک،لیاقت روڈ ،فوارہ چوک ،ڈنگی کھوئی سے ہوتا ہواواپس مرکزی کیمپ جامع مسجد پہنچ کردائرہ کی شکل اختیار کرے گا۔ جلوس کیگزرگاہوں والے مقامات سے مرحلہ وار ڈرائیورشن لگا کر ٹریفک کے لیے بند کیا جائے گا ۔ راولپنڈی سے اسلام آباد جانے والی ٹریفک کو جنگ بلڈنگ یو ٹرن سے کچہری چوک کی طرف موڑا جائے گا ۔ لیاقت باغ سے فوارہ چوک جانے والی ٹریفک کو ڈی اے وی کالج سے گوالمنڈی کی طر ف ڈائیورٹ کیا جائے گا۔دوسرا جلوس ساڑھے نو بجے صبح 22 نمبر چونگی سے نکالا جائے گا جو ٹینچ روڈ ڈھوک سیداں چو ک ،کلمہ چوک،22نمبر چوک،آدڑہ روڈ، سٹیٹ لائف بلڈنگ ٹرن، ایم ایچ چوک، محفوظ چوک، مانسہرہ اڈہ،تھانہ کینٹ، نشتر سٹریٹ،آدم جی روڈ، مٹھوخان احاطہ، ریلوے روڈملٹری اکائونٹ، کامران مارکیٹ سے جی ٹی ایس چوک (پرانا واران اڈہ) اختتام پذیر ہو گا۔ جلوس کے دوران کلمہ چوک سے 22نمبر چوک آنے والی ٹریفک کو ہارلے سٹریٹ کی طرف بھیجا جائے گا۔ خٹک چوک سی ای ایچ اور ٹینچ جانے والی ٹریفک کو ہارلے سٹریٹ کی طرف موڑا جائے گاجبکہ جب جلوس مال روڈ کے قریب ہو گا تو پشاور روڈ سے آنے والی ٹریفک کو قاسم مارکیٹ سے جانب شیر خان روڈ جبکہ کچہری چوک سے آنے والی ٹریفک کو ٹی ایم چوک سے جانب مری روڈ کی طرف موڑا جائے گا۔اس موقع پر چیف ٹریفک آفیسر راولپنڈی نوید ارشاد نے کہاہے کہ جلوس میں ٹریکٹر ٹرالی، پک اپ ،ٹرالر اور ٹرک وغیرہ کا داخلہ ممنوع ہو گا۔سٹیج سے 3سوگز کے ایریا میں کسی قسم کی پارکنگ نہیں ہونے دی جائے گی ۔ انہوں نے کہاکہ ایمبولینس ،فائر بریگیڈ و دیگر سرکاری گاڑیوں کو خصوصی طور پر چیک کیا جائے گا۔ شہر میں ہیوی ٹریفک کے داخلے پربھی مکمل پابندی ہو گی ۔ دریں اثناء آج 12 ربیع الاول کو نکلنے والے مرکزی جلوس سمیت 123 جلوسوں کی سکیورٹی کیلئے راولپنڈی پولیس کے 5ہزار 800 افسران اوراہل کارسیکورٹی ڈیوٹی سرانجام دینگے، ترجمان راولپنڈی پولیس کے مطابق مرکزی جلوس کی سیکورٹی کیلئے 25 سو سے زیادہ افسران و اہلکار فرائض سرانجام دیں گے، ضلع بھر میں مرکزی جلوس کے علاوہ دیگر جلوسوں کی سیکورٹی کیلئے 27سو افسران و اہلکار متعین کئے گئے ہیں ، ٹریفک کی روانی کو برقرار رکھنے کیلئے 513ٹریفک پولیس کے اہلکار فرائض سرانجام دینگے، تمام تھانوں کی نفری بھی اپنے علاقہ میں جلوسوں کی سیکورٹی اور پٹرولنگ کے فرائض سرانجام دے گی،سی پی او سید شہزاد ندیم بخاری کا کہناتھاکہ 12ربیع الاول کے موقع پرسیکورٹی کو یقینی بنانے کیلئے تمام وسائل بروئے کار لائے جا رہے ہیں۔
اسلام آباد سے مزید