• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

خوبصورت لیجنڈ اداکارہ مدھو بالا کا آج یوم پیدائش

آج کا اخبار
اہم خبریں
14 فروری ، 2023
کراچی (نیوز ڈیسک) بالی وڈ پر طویل عرصے تک راج کرنے والی ماضی کی سپر اسٹار اور انتہائی خوبصورت اداکارہ مدھوبالا کی آج سالگرہ ہے۔ وہ 14؍ فروری 1933ءمیں دہلی میں پیدا ہوئیں۔ ان کا پیدائشی نام ممتاز جہاں بیگم دہلوی تھا۔60ءاور 70ءکے عشرے کی انتہائی خوبصورت اور ہمہ جہت خوبیوں سے مالا مال اداکارہ مدھو بالا نے اپنی فلمی زندگی کا سفر نو سال کی عمر میں فلم ”بسنت“ سے شروع کیا۔ فلمساز اور ہدایتکار کیدار شرما نے 1947ءمیں انہیں اپنی پہلی فلم ”نیل کمل“ میں بطور ہیروئن سائن کیا تھا۔ پھر محل، ترانہ، مسٹر اینڈ مسز 55، ہاؤڑا برج، کالا پانی، چلتی کا نام گاڑی جیسی کئی کامیاب فلموں میں انہوں نے کام کیا۔ لیکن فلم ”مغل اعظم“ میں ان کی اداکاری اور ان کے حسن کے بہت چرچے ہوئے۔مدھو بالا کا فلمی سفر جتنا کامیاب رہا ان کی اپنی ذاتی زندگی اتنی ہی ناکام رہی۔انہوں نے اپنے دور کے کامیاب اداکار اور شہنشاہ جذبات دلیپ کمار سے محبت کی۔ چھ سال تک ان کے درمیان دوستی رہی لیکن مدھو بالا کے والد عطاءاللہ خان کو ان کی دوستی پسند نہیں آئی اور یہ حسین جوڑی ٹوٹ گئی۔ اس کے بعد مدھو بالا نے گلوکار کشور کمار سے شادی کی لیکن کم عمری میں ہی23فروری 1969ءمیں ان کا انتقال ہو گیا۔ مدھو بالا کا شمار بالی وڈ کی انتہائی خوبصورت اداکاراؤں میں کیا جاتا ہے۔ ان میں بلا کی خوبصورتی کے ساتھ ساتھ اداکاری کی زبردست صلاحیت تھی۔ وہ ہر کردار میں بخوبی ڈھل جاتی تھیں۔ان کی مشہور فلموں میں ”مغل اعظم“، ”چلتی کانام گاڑی“، ”ارمان“، ”نقاب“، ”کالاپانی“ شامل ہیں۔ انڈین سنیما میں نرگس، مینا کماری اور نوتن جیسی اداکاراؤں کے دور میں مدھوبالا نے اپنی ایک منفرد چھاپ چھوڑی تھی۔
اہم خبریں سے مزید