فرمان الہی
نماز کے اوقات
کراچی (اسٹاف رپورٹر) سابق کپتان اور پی ٹی آئی کے چیئرمین عمران خان نے کہا ہےکہ بابراعظم ایک غیر معمولی صلاحیتوں والابیٹسمین ہے۔ نجی ٹی وی پروگرام میں گفتگو کرتے ہوئے عمران خان نے کہا کہ میں نے جو دیکھا ہے کہ بابر اعظم ہمارا کپتان ہے یہ بہت آؤٹ اسٹینڈنگ بیٹسمین ہے، میں نے بڑی دیر کے بعد ایسا کوالٹی کا بیٹسمین دیکھا ہے، میں نے ہر طرح سے اس کا جائزہ لیا ہے کیونکہ میں بولر کی حیثیت سے بولر کا جائزہ لیتا تھا۔ انہوں نے کہا کہ بابراعظم کی تیکنیک زبردست ہے اس میں ٹیلنٹ بھی ہے ٹمپرامنٹ بھی، تین چیزیں ہی ہوتی ہیں، تیکنیک، ٹمپرامنٹ اور ٹیلنٹ، یہ بڑا کم ہوتا ہے کہ تینوں چیزیں بیٹسمین میں ہوں لیکن بابر میں تینوں چیزیں ہیں اس میں صلاحیت ہے یہ سب سے آگے جائے گا ۔دوسری جانب بابر اعظم اپنے بچپن کے محلے میں عید منانے پہنچ گئے۔ بابر اعظم کا بچپن فردوس مارکیٹ گلبرگ کے علاقے میں گزرا ہے اور چند برس قبل ڈیفنس منتقل ہو گئے تھے۔ بابر اعظم پرانے دوستوں اور محلے داروں سے ملے اور ان کے ساتھ وقت گزارا۔ انہوں نے اپنے ٹوئٹر اکاؤنٹ پر تصاویر بھی جاری کیں۔اس سال اپنے بچپن والے گھر میں عید منانے کا موقع ملا، کیا بے پناہ یادیں ہیں سب کو عید مبارک ہو۔
