• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ٹیکس کے حقیقی امکانات کے حصول کیلئے کوششیں تیز کی جائیں، اسحاق ڈار

آج کا اخبار
اہم خبریں
26 اپریل ، 2023
اسلام آباد(نمائندہ جنگ)وفاقی وزیر خزانہ و ریونیو سینیٹر محمد اسحاق ڈار نے ایف بی آر کی ٹیم سے کہا ہے کہ ملک میں ٹیکس کے حقیقی امکانات کے حصول کے لئے کوششوں کو تیز کیا جائے، مالی سال کے بقیہ مہینوں میں اہداف کو پورا کرنے کیلئے ہر ممکن کوشش کرینگے ۔وفاقی وزیر خزانہ و ریونیو کی زیر صدارت ایف بی آر کی ریونیو کارکردگی کے حوالے سے منگل کو فنانس ڈویژن میں اجلاس ہوا۔وزیراعظم کے معاون خصوصی برائے خزانہ طارق باجوہ،معاون خصوصی برائے ریونیو طارق محمود پاشا، چیئرمین ایف بی آر، اور فنانس ڈویژن اور ایف بی آر کے دیگر سینئر افسران نے اجلاس میں شرکت کی۔چیئرمین ایف بی آر عاصم احمد نے جولائی 2022 سے مارچ 2023 کے ایف بی آر کے ریونیو اہداف اور کارکردگی کے بارے میں تفصیلی پریزنٹیشن دی۔اس بات کا اظہار کیا گیا کہ ایف بی آر مالی سال 23 -2022 کے بقیہ مہینوں میں اپنے اہداف کو پورا کرنے کے لیے ہر ممکن کوشش کرے گا۔وزیر خزانہ نے اطمینان کا اظہار کیا اور ایف بی آر کو ریونیو کی وصولی کے لیے اپنے فرائض کی انجام دہی میں مکمل تعاون فراہم کیا۔واضح رہے کہ ایف بی آر کو ٹیکس ریونیو میں شارٹ فال کا سامنا ہے یہ شارٹ فال درآمد ات پرپابندی کے باعث ہے ، ایف بی آر نے رواں مالی سال 7641ارب روپے کا ٹیکس ریونیو جمع کرنا ہے جبکہ رواں برس کے نو ماہ میں ایف بی آر نے 5156ارب روپے کا ٹیکس ریونیو جمع کیاگیا ہے ۔
اہم خبریں سے مزید