• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

معاشی چیلنجز ضرور لیکن قیامت گزر چکی، اب تباہی کے دہانے پر نہیں، شہباز شریف

آج کا اخبار
اہم خبریں
30 مئی ، 2023
اسلام آباد( نمائندہ جنگ ) وزیر اعظم شہباز شریف نے کہا ہے کہ ایسا لگتا ہے کہ عمران نیازی کی معیشت اور اس کے کام کرنے والے وسیع ماحول کے بارے میں سوجھ بوجھ کافی محدود ہے، وہ معاشی چیلنجوں میں اپنے کردار کو بھی بھول جاتے ہیں،آئی ایم ایف معاہدے کو ختم کرنے سے لے کر، اس نے ہمیشہ پاکستان کو ڈیفالٹ کرنے کی خواہش کی ہے۔ اپنے ٹویٹ میں وزیر اعظم نے کہاکہ یہ ان کے نان سٹاپ احتجاج، لانگ مارچ اور دھرنے کی سیاست کے منفی اثرات اس کے علاوہ ہے جو سیاسی عدم استحکام پیدا کرنے کے حوالے سے معیشت پر پڑا ہے۔پاکستانی سرمایہ کار بھی عمران نیازی کی طرف سے جان بوجھ کر بنائے گئے ایسے غیر مستحکم ماحول میں اپنا سرمایہ لگانے سے کترا رہے ہیں ۔ صرف 9 مئی کے خوفناک واقعات نے معیشت کو اربوں روپے کا نقصان پہنچایا اور یہ اس کے مذموم عزائم کی ناقابل تردید تائید ہے۔انہوں نے کہا کہ اس میں کرپشن کے کیسز کی کثرت کا ذکر نہیں جن میں وہ ملوث ہے۔وزیراعظم نے کہا کہ معاشی چیلنجز کا سامنا ضرور ہے لیکن قیامت ہمارے سروں سے گزر چکی ہے،اب ہم تباہی کے دہانے پرنہیں ،معیشت کو مضبوط بنانے اور بروقت پالیسی کے ذریعے چیلنجز سے نمٹنے کیلئے مخلصانہ کوششیں کی جا رہی ہیں، ہم دوستوں اور شراکت داروں کیساتھ مل کر مالیاتی خلا ءکو ختم کرنے کیلئے بھی کام کر رہے ہیں جہاں ضرورت ہو۔
اہم خبریں سے مزید