عیدالاضحیٰ قریب آتے ہی وارداتیں تیز، ڈاکوؤں نے شہری کی جان لے لی

کراچی(اسٹاف رپورٹر) عید الاضحی قریب آتے ہی شہر میں بینکوں سے رقم لے کر نکلنے والے شہریوں سے لوٹ مار کی وارداتوں کا سلسلہ تیزہو گیا ، تفصیلات کے مطابق ابو الحسن اصفحانی رو ڈ پر موٹرسائیکل سوار2 مسلح ڈاکو بینک سے رقم لے کر نکلنے والے شہری سے اس کے گھر کے نیچے 10لاکھ روپے لوٹ کر فرار ہوگئے ،علاوہ ازیں آفریدی کالونی میں3 پولیس کی وردی اور 3 سادہ کپڑوں میں ملبوس ملزمان خود کو پولیس اہلکار ظاہر کرکے تاجر محمد شریف کے گھر میں داخل ہوئے اور اور اسلحہ چیک کرانے کوکہا ،ملزمان نے پستول لینے کے بعد اہلخانہ کو رسیوں سے باندھ دیا اور گھر سے 2 لاکھ روپے نقد، 10 لاکھ سے زائد مالیت کے طلائی زیورات، لائسنس یافتہ پستول اور قیمتی سامان لوٹ لیا ، ملزمان2 گھنٹے تک گھر میں موجود رہے اور واردات کے بعد اطمینان سے فرار بھی ہوگئے،متاثرہ تاجر کا کہناہے کہ پولیس نے واردات کا مقدمہ درج نہیں کیا، دریں اثنا گلشن اقبال میں ڈکیتی مزاحمت پر ایک اورشہری جاں سے گیا، موٹرسائیکل سوار2 نامعلوم ڈاکوئوں نے لوٹ مار کے دوران مزاحمت پر فائرنگ کردی جس سے 30 سالہ احتشام جان بحق ہوگیا ۔