MQM پاکستان نے پرانی حلقہ بندیوں پر الیکشن قبول کرنے سے انکار کردیا

کراچی (اسٹاف رپورٹر) ایم کیو ایم پاکستان کے کنوینر ڈاکٹرخالدمقبول صدیقی نے کہا ہے کہ کراچی کی آبادی کسی صورت تین کروڑ سے کم نہیں، پرانی حلقہ بندیوں اور ووٹر لسٹوں پر الیکشن ناقابل قبول ہیں۔ کراچی میں پریس کانفرنس کے دوران خالدمقبول صدیقی نے کہا کہ متعصب اور نسل پرست افسران نے ووٹر لسٹ بنائی، چالیس فیصد لوگوں کے ایڈریس اور پولنگ اسٹیشن پر کنفیوژن پیدا کی گئی ہے۔ تحفظات دور کئے جائیں ورنہ امن کی ذمہ داری کو شاید ہم پورا نہ کرپائیں۔ خالد مقبول صدیقی کا کہنا تھا کہ جمہوریت کو بچانے کیلئے ہم نے جووعدے کئے تھے وہ پورے کئے، ملک کی2اہم ترین جماعتوں کی جانب سے مطالبے کے پورے ہونے کے منتظر ہیں، ایم کیوایم پاکستان بروقت الیکشن کی حامی ہے، شفاف، غیرجانبدار الیکشن کو ہی الیکشن سمجھتے ہیں۔ انہوں نے کہا کہ اپنے حصے کی قربانی دیکرہم نے کراچی کا امن خراب نہیں ہونے دیا، شہرکےامن کیلئے ہم نے تمام تر کوششیں کرلیں، شفاف الیکشن ایم کیوایم پاکستان کا ہمیشہ سے مطالبہ رہاہے۔ ایم کیوایم پاکستان ہی ایم کیوایم ہے، ایم کیو ایم لندن ایم کیوایم نہیں ہے۔ پاکستان کی حرمت کی خاطر ہم نے اپنی لیڈرشپ کو خیرباد کہا۔