فرمان الہی
نماز کے اوقات
کراچی ( اسٹاف رپورٹر) ایمرجنگ ایشیا کپ کرکٹ ٹائٹل کیلئے پاکستان اور بھارتی نوجوان کرکٹرز اتوار کو ٹکرائیں گے۔
پاکستان شاہینز دفاعی چیمپئن ہے۔ پاکستان شاہینز نے ایمرجنگ ایشیا کپ کے سیمی فائنل میں سری لنکا اے کو 60رنز سے شکست دے کر فائنل میں رسائی حاصل کرلی ۔
دوسرے سیمی فائنل میں بھارت اے نے بنگلہ دیش اے کو60رنز سے شکست دے دی ۔جمعے کو پی سارا اوول میں پاکستان شاہینز نے ٹاس جیت کر پہلے بیٹنگ کی اور50اوورز میں322رنز بنائے۔ ناکام ٹیم262رنز بناکر آؤٹ ہوگئی۔ ارشد اقبال نے37رنز دے کر5وکٹیں حاصل کیں۔
پاکستانی اوپنرز صائم ایوب اور صاحبزادہ فرحان کے جلد آؤٹ ہونے کے بعد عمیر بن یوسف نے79گیندوں پر88رنز اسکور کیے جس میں ایک چھکا اور دس چوکے شامل تھے۔
طیب طاہر نے26رنز بنائے۔ کپتان محمد حارث اور مبصرخان کے درمیان چھٹی وکٹ کی شراکت میں73رنز بنے ۔ محمد حارث نے 43گیندوں پر52رنز پانچ چوکوں کی مدد سے بنائے ۔
مبصرخان نے دو چھکوں اور دوچوکوں کی مدد سے 42 ، محمد وسیم جونیئر نے دو چھکوں اور ایک چوکے کی مدد سے24 رنز کی اننگز کھیلی۔
سری لنکا اے کے لاہیرو سمارا کون اور چامیکا کرونا رتنے نے دو دو وکٹیں حاصل کیں۔ جواب میں ہوم ٹیم کی تین وکٹیں33رنز پر گرگئی تھیں۔
اوشکا فرنینڈو اور ساہن اراچیگے نے چوتھی وکٹ کی شراکت میں124رنز کا اضافہ کیا۔
اوشکا فرنینڈو12چوکوں اور2چھکوں کی مدد سے97رنز بناکر سفیان مقیم کی گیند پر حارث کے ہاتھوں اسٹمپڈ ہوگئے۔
ساہن اراچیگے بھی 97 رنز بناکر مبصر خان کی گیند پر بولڈ ہوگئے۔ ارشد اقبال کی پانچ وکٹوں کے علاوہ مبصر خان اور سفیان مقیم نے دو دو وکٹیں حاصل کیں۔
