وزیر کھیل نے آل پاکستان وزیراعلیٰ گولڈ کپ فٹبال ٹورنامنٹ کا افتتاح کیا

کوئٹہ(اسٹاف رپورٹر) چوتھا آل پاکستان وزیر اعلیٰ بلوچستان گولڈ کپ فٹبال ٹورنامنٹ کا آغاز ہوگیا۔ صوبائی وزیر کھیل وثقافت نوابزادہ جمال رئیسانی نے ایوب اسٹیڈیم میں باقاعدہ فٹبال کوکک لگاکر ٹورنامنٹ کاافتتاح کیا، اس موقع پرسیکرٹری سپورٹس اسحاق جمالی ڈی جی سپورٹس درابلوچ بھی موجود تھے۔ وزیر کھیل جمال رئیسانی نے میڈیا سے بات چیت کرتے ہوئے کہاکہ جہاں کھیل کے میدان آباد ہوتے ہیں وہاں کے ہسپتال ویران ہوتے ہیں، امن دشمنوں کو پیغام دینا ہے کہ کھیلوں کے ذریعے ہی دنیا میں پیغام پہنچا رہے ہیں کہ بلوچستان کےعوام پرامن مہمان نواز اور کھیلوں سے محبت کرنے والے ہیں، ڈیرہ بگٹی سے آنے والے چھ کھلاڑیوں کو اغوا کیا گیا لیکن ہمارے حوصلے پست نہیں ہوئے ہم ان اغواکاروں کو کسی صورت معاف نہیں کیا جائے گا۔ اس موقع پر سیکرٹری سپورٹس اسحاق جمالی نے خطاب کرتے ہوئے کہا کہ چوتھا آل پاکستان فٹبال ٹورنامنٹ کاانعقاد محکمہ سپورٹس بورڈ کی بڑی کامیابی ہے، اس ایونٹ میں ملک بھر سے 52ٹیمیں حصہ لے رہی ہیں جس میں چاروں صوبوں اور مختلف محکموں کی ٹیمیں شامل ہیں ٹورنامنٹ 14روز تک جاری رہے گا۔اس سے قبل پولیس اور مسلم کلب چمن کی ٹیموں کے درمیان نمائشی میچ کھیلا گیا وزیر کھیل نوابزادہ جمال رئیسانی جو خود فٹبال کے کھلاڑی ہیں، پولیس ٹیم کی نمائندگی کرتے ہوئے نمائشی میچ کھیلا اورچار گول کرنے کے مواقع بھی بنائے لیکن گول نہ ہوسکا جبکہ مسلم کلب چمن نے نمائشی میچ صفر کے مقابلے میں چار گول سے جیت لیا، آج راؤنڈ کے سلسلے میں پانچ میچ کھیلے جائیں گے۔