• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جیو ٹی وی نے بھارت کے معروف چینلز کوشکست دیکر ایشین 2023 ایوارڈ جیت لیا

آج کا اخبار
اہم خبریں
30 اکتوبر ، 2023
مانچسٹر (مرتضیٰ علی شاہ/ ہارون مرزا) جیو ٹی وی نے ایشین میڈیا ایوارڈ2023جیت لیا۔ ایشین میڈیا ایوارڈ کو برطانیہ میں انتہائی معتبر اور اہم ایشین ایوارڈ تصور کیا جاتا ہے۔ جیو ٹی وی نے انٹرٹینمنٹ کٹیگری میں بھارت کے معروف چینلز کو شکست دے کر یہ ایوارڈ جیتا، جیوری نے جیو پر دکھائے جانے والے پروگراموں کا تفصیلی جائزہ لینے کے بعد یہ فیصلہ کیا کہ جیو نے پورے سال بہترین پروگرام پیش کئے اور ایشیا کے دیگر تمام انٹرٹینمنٹ چینلز کو پیچھے چھوڑ دیا۔ پینل میں شامل ججوں کو، جن میں سنجے شابی، اکنکشاہ سکسینہ، انیسہ صوبیدار، مارک رائے، ویدر ہجر ڈینگ ایم بی ای، معراج اسلام، ٹو نی جانسن، اینڈریو ڈکنسن، ناظمہ نور،ٹومی ناگرہ، نک نن، نرین پٹیل، تارا پریم، ڈیبرے پرنس کلیئر، طلعت فاروق اعوان، شیلینا بیگم، پال بروسٹر، شمیم چوہدری، ارون اقبال اور روبی زمان جیسی آزمودہ کار شخصیات شامل تھیں۔ ہلٹن مانچسٹر ڈیجز گیٹ پر ہونے والی اس رنگارنگ تقریب میں معروف ایشیائی ستارے بھی شریک تھے۔ ایشین میڈیا ایوارڈکے اسپانسرز میں آئی ٹی وی، میڈیا کوم، ریچھ پی ایل سی یوکے اور آئر لینڈ کے سب سے بڑے کمرشل نیوز پبلشر وومین ان جرنلزم شامل تھے۔ جیوٹی وی انٹرنیشنل ڈویژن کے سربراہ بسیم بیگ بھی تقریب میں موجود تھے اور انھوں نے ایوارڈ وصول کیا۔ اس موقع پر انھوں نے اپنی مختصر تقریر میں جیو ٹی وی کو میرٹ پر بہترین چینل منتخب کرنے پر جیوری میں شامل شخصیات کا شکریہ ادا کیا۔ انھوں نے کہا کہ یہ وہ جگہ ہے، جہاں برطانیہ میں بڑے میڈیا ایشیا کی تخلیقی صلاحیتوں اور کوششوں اور انڈسٹری کے ٹیلنٹ کا اعتراف کرتے اور اسے سپورٹ کرتے ہیں۔ انھوں نے کہا کہ جیو ٹی وی نیٹ ورک روزنامہ جنگ کا ذیلی ادارہ ہے، روزنامہ جنگ جنوبی ایشیا کا پہلا اخبار ہے، جس نے مارچ 1971 کو برطانیہ سے اخبار نکالنے کے بعد ایک لمبا، ایک طویل سفر طے کیا ہے، آج جیو ٹی وی اس ورثے، ثقافت اور روایات کے امین کی حیثیت سے اسے آگے بڑھا رہا ہے، جو دہائیوں کے دوران اسے منتقل کیا گیا ہے۔ انھوں نے کہا کہ یہ ایوارڈ ٹیم جیو اور اس کے سرپرست ادارے جنگ گروپ کی سخت محنت اور کاوشوں کا اعتراف ہے، جنگ گروپ نے گزشتہ 52 سال کے دوران جو ڈیلیور کیا، آج جیو ٹی وی اسپورٹس، نیوز، حالات حاضرہ سے ڈرامہ سیریلز، افسانوں، ٹیلی فلمز، آن لائن مواد اور بہت کچھ رنگا رنگ انداز میں پیش کررہا ہے، جیت کے جیو۔ ایوارڈز کے ایک ترجمان نے کہا کہ ہم ہر سال معیاری انٹریز کو دیکھتے ہیں لیکن یہ سال ہمیشہ کے مقابلے میں بہت مشکل تھا۔ ہم اپنی کاوشیں پیش کرنے والے تمام اداروں اور ججوں کے پینل کا شکریہ ادا کرنا چاہتے ہیں، جنھوں نے پورے سال کے دوران پیش کئے جانے والے اعلیٰ درجےکے پراجیکٹ کی سفارش کی۔ انڈسٹری تخلیقی اور زندگی سے بھرپور پروگرام پیش کرتی رہے اور ایک نیا ایوارڈ انھیں پیش کر کے ان کی سپورٹ کا سلسلہ جاری رکھے گا۔ ایشین ایوارڈ 2023 کی یہ تقریب ہلٹن مانچسٹر ڈینز گیٹ میں منعقد ہونے والی اپنی نوعیت کی 9 ویں تقریب تھی، اس میں مجموعی طورپر 25 کٹیگریز کو ایوارڈز سے نوازا گیا جس میں 6 خصوصی ایوارڈز شامل تھے۔
اہم خبریں سے مزید