فرمان الہی
نماز کے اوقات
کراچی ( اسٹاف رپورٹر ) سندھ ہائی کورٹ نے ڈسٹرکٹ سینٹرل میں غیر قانونی تعمیرات کے خلاف درخواست پر کارروائی نہ کرنے پر ڈائریکٹر اور ڈپٹی ڈائریکٹر سینٹرل ایس بی سی اے کے شناختی کارڈ بلاک رکھنے کا حکم دے دیا۔ ہائی کورٹ میں ڈسٹرکٹ سینٹرل میں غیر قانونی تعمیرات کے خلاف درخواست کی سماعت ہوئی۔ غیر قانونی تعمیرات کے خلاف کارروائی نہ کرنے پر عدالت برہم ہوگئی۔ عدالت نے ریمارکس دیئے کہ ایس بی سی اے افسران نے اپنی رپورٹ میں بتایا کہ گراؤنڈ پلس ون کی اجازت لے کر چار منزلہ عمارت تعمیر کردی گئی ہے۔ ایس بی سی اے حکام نے بتایا کہ عمارت کی چوتھی منزل جزوی طور پر گرائی ہے۔ عمارت میں رہائش پذیر لوگوں کو عمارت خالی کرنے کا نوٹس دیا گیا ہے۔ عمارت کے بجلی اور گیس کنیکشن منقطع کرنے کے لیے متعلقہ اداروں کو لیٹرز لکھے ہیں۔ عدالت نے ریمارکس دیئے کہ بیلف رپورٹس سے پتہ چلتا ہے کہ عدالتی نوٹس کے وقت بلڈنگ زیر تعمیر تھی۔ نوٹس کے باوجود عمارت کی تعمیر مکمل ہوئی اور لوگوں کو بسایا گیا ہے۔ اس سے ثابت ہوتا ہے کہ ایس بی سی اے افسران بلڈر سے ملے ہوئے ہیں۔ ایس بی سی اے افسران نے عدالت کو یقین دہانی کرائی کہ آئندہ سماعت سے قبل غیر قانونی تعمیرات ختم کرادی جائیں گی۔ عدالت نے ریمارکس دیئے کہ ڈپٹی کمشنر سینٹرل،ایس ایس پی سینٹرل ایس بی سی اے کو سیکورٹی فراہم کریں۔ یوٹیلیٹی ایجنسیز فوری طور پر سیکنڈ، تھرڈ اور فورتھ فلور کی بجلی، گیس کے کنیکشن منقطع کریں۔ عدالت نے ڈائریکٹر اور ڈپٹی ڈائریکٹر سینٹرل ایس بی سی اے کے شناختی کارڈ بلاک رکھنے کا حکم دے دیا۔ عدالت نے ہدایت کی ڈائریکٹر عامر کمال جعفری اور شیخ شاہد کا شناختی کارڈ 7 فروری تک بلاک رکھیں۔
