گلشن حدید میں مبینہ زیادتی کی کوشش لڑکی نے ناکام بنادی

کراچی (اسٹاف رپورٹر ) گلشن حدید میں مبینہ زیادتی کی کوشش لڑکی نے ناکام بنادی ،پولیس نے واقعہ کا مقدمہ درج کرکے ملزم کو گرفتار کرلیا۔ پولیس نے واقعہ کا مقدمہ متاثرہ لڑکی کے چچا اعجاز شیخ کی مدعیت میں امیر خان اور مالک کے خلاف درج کرکے ملزم امیر خان کو گرفتار کرلیا ہے جبکہ بنگلے کا مالک ڈاکٹر عاشق حبیب پلیجو فرار ہوگیا ہے۔تفصیلات کے مطابق اسٹیل ٹاون تھانے کی حدود گلشن حدید میں واقع گھر میں موجود لڑکی سے مبینہ زبردستی کی کوشش کی گئی جس پر لڑکی نے مزاحمت کرتے ہوئے زیادتی کی کوشش کو ناکام بنا دیا۔مزاحمت کے دوران ملزم اور لڑکی دونوں زخمی ہوگئے۔ متاثرہ لڑکی کے مطابق پڑوسی ڈاکٹر کا چوکیدار گھر کی دیوار پھلانگ کر ہمارے گھر میں داخل ہوگیا اور میرا منہ پر ہاتھ رکھ کر خاموش رہنے کی دھمکیا ں دی ، میں نے ہمت کا مظاہرہ کرتے ہوئے شور مچایا جس پر ملزم نے مجھے تشدد کا نشانہ بنانا شروع کردیا ، میں نے مزاحمت جاری رکھی تو ملزم بھاگنے پر مجبور ہوگیا۔متاثرہ لڑکی نے بتایا کہ میں اور میرے چچا گلشن حدید میں غریب بچوں کو مفت تعلیم دیتے ہیں ،ہم نے اپنے گھر کو فری مدرسہ اسکول میں تبدیل کیا ہواہے۔