پاکستانی گلوکارہ سائرہ پیٹر کو برطانوی ترانے کی ریکارڈنگ پر کنگ چارلس کی طرف سے تعریفی خط موصول

اسلام آباد (نامہ نگار خصوصی) کنگ چارلس سوم کی تاج پوشی کے بعد برطانوی قومی ترانے کی ریکارڈنگ پر بکنگھم پیلس کی جانب سے پاکستانی نژاد برطانوی گلوکارہ (اوپیرا اسٹار) سائرہ پیٹر کو خصوصی تعریفی خط موصول ہوا ہے۔ سوپرانو ووکل رینج میں پیش کی جانے والی ریکارڈنگ حاصل کرنے کے بعد، کنگ چارلس نے سائرہ کے نام ایک خط بھیجا ہے جس میں ان کی عوامی خدمات کے لئے نیک خواہشات اور خلوص دل سے شکریہ ادا کیا گیا ہے۔ خط میں کنگ چارلس اور ملکہ کیمیلا کا دستخط شدہ فوٹو کارڈ بھی شامل ہے۔ ہیسٹنگز ٹاون ہال (ایسٹ سوسیکس) میں برطانوی حکومت کے دفاتر کی درخواست پر تیار کی گئی یہ ریکارڈنگ پورے خطے میں سرکاری تقریبات بشمول شہری تقریبات کیلئے استعمال کی جاتی ہے۔