• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جامعہ کراچی: ایک ارب 67 کروڑ فیس کا جائزہ لینے کیلئے کمیٹی قائم

آج کا اخبار
اہم خبریں
18 اکتوبر ، 2024
کراچی( اسٹاف رپورٹر) جامعہ کراچی کے وائس چانسلر ڈاکٹر خالد محمود عراقی کی ہدایت پر طلبہ کی طرف سے جمع کرائی گئی لیٹ فیس معافی/ رعایت کی درخواستوں کا جائزہ لینے کے لیے سہ رکنی کمیٹی تشکیل دے دی گئی ہے۔ قائم مقام رجسٹرار ڈاکٹر عبدالوحید کے نوٹیفکیشن کے مطابق کمیٹی کو درخواست دہندگان کی جانب سے ان کی آمدنی اور مالی حیثیت سے متعلق فراہم کردہ دستاویزات اور ثبوتوں کی بنیاد پر ہر درخواست کا اچھی طرح سے جائزہ لینے کا پابند بنایا گیا ہے۔ شعبہ فارماسیوٹیکل کیمسٹری جامعہ کراچی کے پروفیسر ڈاکٹر فیاض وید کمیٹی کے سربراہ ہوں گے جب کہ مشیر امور طلبہ ڈاکٹر نوشین رضا اور اسٹوڈنٹ فنانشل ایڈ یونیورسٹی آف کراچی کی انچارج ڈاکٹر ضیاسمہ حنیف خان رکن ہوں گی۔ کمیٹی کے پاس ہر کیس کے میرٹ کا بغور جائزہ لینے کے بعد وائس چانسلر کو 40 فیصد تک لیٹ فیس معاف کرنے کی سفارش کرنے کا اختیار ہوگا۔ سفارشات کو معروضی طور پر اور ادارے کی طرف سے مقرر کردہ رہنما خطوط کے مطابق بنایا جانا چاہیے۔ تمام متعلقہ افراد کو ہدایت کی گئی ہے کہ کمیٹی کو اپنا بھرپور تعاون فراہم کریں۔ جامعہ کراچی کے مطابق 12459 طلبہ نے سیمسٹر کی فیسیں جمع نہیں کرائی ہیں صرف شام اور صبح کے طلبہ پر سمسٹر فیس مع لیٹ فیس چارجز ایک ارب 67 کروڑ روپے واجب الادا ہیں جس میں لیٹ فیس کے 30کروڑ30 لاکھ روپے بھی شامل ہیں۔
اہم خبریں سے مزید