کوئٹہ(اسٹاف رپورٹر)جماعت اسلامی ضلع کوئٹہ کے زیراہتمام 27 اکتوبر یوم سیاہ کشمیر کے سلسلے میں نومنتخب ضلعی امیرعبدالنعیم رند کی قیادت میں احتجاجی مظاہرہ کیا گیا ، مظاہرین سے جماعت اسلامی کے صوبائی امیر رکن اسمبلی مولا ناہدایت الرحمٰن بلوچ ، صوبائی جنرل سیکرٹری مرتضی ٰخان کاکڑ ، ضلعی امیرعبدالنعیم رند نے خطاب کرتے ہوئے کہا کہ آج ملک بھر امیر جماعت اسلامی پاکستان کی اپیل پر یوم سیاہ منایا جارہا ہے ، ملک بھر کی طرح بلوچستان میں بھی کشمیری عوام پر بھارتی مظالم کے خلاف جماعت اسلامی یوم سیاہ منارہی ہے ، بھارتی مظالم کے خلاف اور مظلوم کشمیریوں سے یکجہتی کیلئے ہم سب ایک ہیں ۔ انہوں نے کہا کہ قیام پاکستان سے بھارت مظلوم کشمیری عوام کا قتل عام کررہا ہے ، بھارتی درندوں نے کشمیر پر غاصبانہ قبضہ کررکھا ہے اور کشمیری عوام کا قتل عام کررہا ہے ۔ جہاد کے بغیر کشمیر آزاد نہیں ہوسکتا اور جہاد کا اعلان حکمرانوں نے کرنا ہے ، کشمیر کی آزادی اور جہاد کیلئے پاک فوج کو آگے آنا ہوگا ،کشمیر کی مائیں بہنیں ہمیں پکار رہی ہیں ،حکمران تماشہ دیکھنے کے بجائے مظلوموں کا عملی ساتھ دیں ۔ انہوں نے کہا کہ جماعت اسلامی کشمیر ، فلسطین سمیت دنیا کے تمام مظلوموں کے ساتھ ہے ۔