فرمان الہی
نماز کے اوقات
بھارت کے معروف کامیڈین اور اداکار کیکو شردھا کا کہنا ہے کہ اگر موقع ملا تو پاکستان میں کراچی اور لاہور ضرور جاؤں گا، ماضی میں انور مقصود کا مشہور شو لوز ٹاک بہت شوق سے دیکھتا تھا۔
کامیڈی نائٹس ود کپل اور دی کپل شرما شو میں اپنے یادگار کرداروں کی وجہ سے عالمی شہرت حاصل کرنے والے کامیڈین کیکو شردھا نے ڈیلس میں جیو اور جنگ کے نمائندے سے خصوصی گفتگو کی۔
انہوں نے کہا کہ پاکستان جانے کی خواہش ہے، مگر ابھی تک جانے کی کوئی کوشش نہیں کی، لیکن اب ضرور کروں گا کیونکہ وہاں کے لوگوں کا پیار محسوس ہوتا ہے، اگر موقع ملا تو میں پاکستان کے لاہور اور کراچی جیسے بڑے شہروں میں ضرور جاؤں گا اور اپنے مداحوں سے ملاقات کروں گا۔
انہوں نے کہا کہ سوشل میڈیا کے ذریعے معلوم ہوتا ہے کہ پاکستان میں بھی میرے بہت سے مداح ہیں۔
کیکو شردھا کا کہنا ہے کہ ہم نے ہمیشہ پاکستانی مزاح کو بہت سراہا ہے، پاکستان میں بھی کامیڈی کے شعبے میں بے پناہ کام ہوا ہے، میں یہاں پاکستانی دوست ناصر صدیقی سے بات کر رہا تھا اور ذکر کیا کہ میں ماضی میں انور مقصود کا مشہور شو لوز ٹاک بہت شوق سے دیکھتا تھا، وہ میرا سب سے پسندیدہ شو رہا ہے۔
انہوں نے بتایا کہ پہلے کپل شرما کے ساتھ ڈیلس آ چکا ہوں، لیکن اس بار اپنے انفرادی شوز کے لیے آیا ہوں، امریکی شوز بہت زبردست ہیں اور یہاں کی آڈیئنس، جس میں پاکستانی نژاد افراد بھی شامل ہیں، بہت رسپونسیو ہیں جو کامیڈی کو سمجھتے ہیں، یہ کامیڈی میں بہت ضروری ہوتا ہے کہ ناظرین مزاح کو سمجھیں اور اسے انجوائے کریں۔
کیکو شردھا نے کہا کہ میں نے یہاں اپنے پرانے کردار جیسے بچہ یادو، پلک اور سنی دیول کے مزاحیہ انداز کو دوبارہ پیش کیا ہے۔
ذاتی زندگی اور خوش مزاجی سے متعلق ایک سوال کہ کیا ان کی ہنسی کے پیچھے کوئی غم چھپا ہوا ہے؟ جس کا جواب دیتے ہوئے اداکار نے کہا کہ مجھے کوئی خاص غم نہیں ہے، میں ٹھیک ہوں اور خوشی خوشی اپنا کام کرتا ہوں، لوگوں کو ہنسانے میں جو خوشی ملتی ہے وہ ناقابلِ بیان ہے جب لوگ ہمیں دیکھ کر مسکراتے ہیں، تو میرے لیے اس سے بڑھ کر خوشی کی کوئی بات نہیں ہو سکتی۔
کپل شرما شو میں سدھو کی واپسی کے بارے میں پوچھے گئے سوال کا جواب دیتے ہوئے انہوں نے کہا کہ ابھی تک سدھو صاحب ایک ایپی سوڈ کے لیے بطور مہمان آئے ہیں، لیکن آگے کیا ہوتا ہے، یہ وقت بتائے گا، سدھو صاحب کے ساتھ بہت یادگار کام کیا ہے، ان کے ون لائنرز کمال کے ہوتے ہیں اور یقیناً میں انہیں مس کرتا ہوں۔
انہوں نے دیارِ غیر میں مقیم جنوبی ایشیائی کمیونٹی کو مشورہ دیتے ہوئے کہا کہ زندگی کو زیادہ پیچیدہ نہ بنائیں، جب آپ خود اپنی زندگی کو کمپلیکیٹ کرتے ہیں، تو مسائل آتے ہیں۔ اپنے دماغ کو پُرسکون رکھیں اور آسانی سے اپنی زندگی گزاریں۔
اس موقع پر ان کے ہمراہ ناصر صدیقی، کمال صدیقی، مینو گپتا اور رینا شرما بھی موجود تھیں۔
