• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کیڈٹ کالج سانگھڑ میں 28 ویں سالانہ یوم والدین کا انعقاد

آج کا اخبار
اہم خبریں
07 جنوری ، 2025
کراچی ( اسٹاف رپورٹر ) کیڈٹ کالج سانگھڑ (سی سی ایس) میں 28ویں یوم والدین کی تقریب منعقد ہوئی جس میں پاک بحریہ کے سربراہ ایڈمرل نوید اشرف نے بطور مہمان خصوصی شرکت کی۔ مہمان خصوصی کی آمد پر کیڈٹس کے چاق و چوبند دستے نے سلامی اور گارڈ آف آنر پیش کیا۔ تقریب سے خطاب کرتے ہوئے نیول چیف نے کیڈٹس کو بہترین تربیتی سہولیات فراہم کرنے اور بورڈ کے سالانہ نتائج میں کیڈٹس کی جانب سے نمایاں پوزیشن حاصل کرنے پر فیکلٹی اور انتظامیہ کی کاوشوں کی تعریف کی۔ انہوں نے ادارے کی ترقی اور فلاح کے لیے حکومت سندھ کی مسلسل معاونت کو سراہا۔ مہمان خصوصی نے کیڈٹ کالج سانگھڑ میں اعلیٰ تعلیمی معیار اور کردار سازی کو یقینی بنانے کے لیے ہیڈکوارٹر کمکار کی کوششوں کی بھی تعریف کی۔ قبل ازیں کیڈٹ کالج سانگھڑ کے پرنسپل کموڈور ذیشان علی نے سالانہ رپورٹ پیش کی اور تعلیمی، کھیلوں اور ہم نصابی سرگرمیوں میں کیڈٹس کی غیر معمولی کارکردگی پر روشنی ڈالی۔ بعد ازاں مہمان خصوصی نے سال 2024 میں شاندار کارکردگی کا مظاہرہ کرنے والوں میں انعامات تقسیم کئے۔ سابق کیڈٹ فہیم احمد اور سابق کیڈٹ صاحب خان نے بالترتیب اسٹک آف آنر اور بیج آف آنر کے اعلیٰ ترین انعامات حاصل کیے۔ سابق کیڈٹ جنید بابر نے بہترین تعلیمی کارکردگی پر قائداعظم میڈل حاصل کیا جبکہ کیڈٹ محمد عزیز کو بہترین اسپورٹس مین کا ایوارڈ اور کیڈٹ محمد علی کو سال 2024 کا بہترین ڈیبیٹر قرار دیا گیا۔ تقریب میں پریڈ، پی ٹی شو، ٹائیگر اسکواڈ ڈرل اور ٹینٹ پیگنگ شامل تھیں جن سے حاضرین نے بھرپور لطف اٹھایا اور کیڈٹس کی کارکردگی کو سراہا۔ مہمان خصوصی نے کیڈٹس کی طرف سے پیش کی گئی سائنس، آرٹس اور ثقافتی نمائش کا بھی مشاہدہ کیا اور ان کی کاوشوں اور محنت کو سراہا۔ تقریب میں اعلیٰ سول و فوجی حکام، بورڈ آف گورنرز کے ارکان اور کیڈٹس کے والدین کی بڑی تعداد نے شرکت کی۔
اہم خبریں سے مزید