فرمان الہی
نماز کے اوقات
کراچی( افضل ندیم ڈوگر) سعودی عرب، متحدہ عرب امارات اور چین سمیت 7 ملکوں سے گزشتہ 24 گھنٹے کے دوران مزید 258پاکستانیوں کو بے دخل کر دیا گیا ہے۔ جن میں 14 افراد پاکستانی پاسپورٹس جبکہ244 ایمرجنسی دستاویزات پر ڈی رپورٹ کئے گئے۔ مشکوک شناخت کے حامل ایک مسافر سمیت 16ڈی پورٹیز کو کراچی پہنچنے پر گرفتار کر لیا گیا جبکہ دیگر کو پوچھ گچھ کے بعد رہا کر دیا گیا۔ امیگریشن ذرائع کے مطابق گزشتہ 24 گھنٹے کے دوران سعودی عرب سے ڈی پورٹ بے دخل کیے گئے 7بھکاریوں سمیت 232 پاکستانیوں کو مختلف پروازوں سے کراچی منتقل کیا گیا۔ امیگریشن ذرائع کے مطابق ڈی پورٹ کیے گئے افراد میں سے 2 بغیر پرمٹ حج کرنے پر پکڑے گئے تھے۔ انہیں سزا پوری ہونے پر وطن واپس بھیجا گیا۔ عمرے پر گئے 4 پاکستانیوں نے زائد المیاد قیام کیا۔ 27پاکستانی کفیل کے بغیر ملازمت کرتے پکڑے گئے۔ 16ویزے کی مدت ختم ہونے کے بعد قیام پزیر تھے۔ 112 پاکستانیوں کو کفیلوں کی شکایت پر گرفتار کرکے پاکستان بھیجا گیا جبکہ 63 پر مختلف نوعیت کے الزامات عائد ہیں۔ متحدہ عرب امارات سے 21 پاکستانیوں کو ڈی پورٹ کیا گیا جن میں 4پاکستانی منشیات کی اسمگلنگ میں ملوث تھے۔ امیگریشن ذرائع کے مطابق چین، قطر، انڈونیشیا، قبرس اور نائجیریا سے ایک ایک پاکستانی کو ڈی پورٹ کیا گیا ہے۔ یو اے ای اور نائیجیریا سے ڈی پورٹ کیے گئے16افراد کے نام ایف آئی اے امیگریشن کی اسٹاپ لسٹ میں شامل تھے جنہیں پوچھ گچھ کے بعد رہا کر دیا گیا۔ مختلف ملکوں سے پاکستانیوں کی بے دخلی میں کافی تیزی دیکھنے میں آرہی ہے۔
