فرمان الہی
نماز کے اوقات
کراچی(اسٹاف رپورٹر)امریکا کے دورے پر پاکستان کرکٹ بورڈ کے چیئرمین محسن نقوی نےیو ایس اے کرکٹ کے چیف ایگزیکٹو آفیسر جوناتھن اٹکیسن سے ملاقات کی ۔ ملاقات میں پاکستان اور امر یکاکے درمیان کرکٹ سیریز کرانے پر تبادلہ خیال کیا گیا ۔پی سی بی کا کہنا ہے کہ پاکستان۔ امر یکا اور کینیڈا کے مابین ٹرائی سیریز کے امکانات پر بھی بات چیت کی گئی ۔ ملاقات میں پاکستان اور امر یکا کی ویمنز ٹیمز کے درمیان ایک دوسرے کے ملکوں میں سیریز کرانے پر گفتگو بھی ہوئی۔ملاقات میں پاکستان اور امریکا کی مینز اور ویمنز ٹیموں کے درمیان سیریز کرانے پر اتفاق کیا گیا اور اس ضمن میں دونوں ملکوں کے بورڈز کرکٹ سیریز کرانے کے پروگرام کو حتمی شکل دیں گے۔چئیرمین پی سی بی محسن نقوی نے یو ایس اے کرکٹ کے سی ای او کو ہر ممکن معاونت کی یقین دہانی کروائی۔ چئیرمین پی سی بی محسن نقوی نے کہا کہ امریکا میں کرکٹ کے فروغ کیلئے پی سی بی بھرپور تعاون فراہم کرنے کے لئے تیار ہے۔چئیرمین پی سی بی محسن نقوی نے امر یکا کے کوچز کو پاکستان میں تربیت دینے کی پیشکش کی ۔چئیرمین پی سی بی محسن نقوی نے یو ایس اے کرکٹ کے چیف ایگزیکٹو آفیسر کو چیمپئنز ٹرافی ٹورنامنٹ کے میچز دیکھنے کے لئے پاکستان آنے کی دعوت دی۔ چیئرمین پی سی بی محسن نقوی نے کہا کہ پاکستان اور امر یکا کے درمیان کرکٹ کے فروغ کے بے پناہ مواقع ہیں۔یو ایس اے کرکٹ کے چیف ایگزیکٹو آفیسر نے چیمپئنز ٹرافی ٹورنامنٹ کی دعوت پر چیئرمین پی سی بی محسن نقوی کا شکریہ ادا کیا۔چیف ایگزیکٹو آفیسر پی ایس ایل سلمان نصیر بھی اس موقع پرموجود تھے۔
