فرمان الہی
نماز کے اوقات
کراچی ( رفیق مانگٹ) پٹرول کے لحاظ سے سستے ترین ممالک میں پاکستان 36، بنگلہ دیش 46اور بھارت 73ویں نمبر پر ہے ، ایران میں 7.98روپے فی لیٹر کے ساتھ پٹرول سب سے سستا، ہانگ کانگ میں 950روپے فی لیٹر مہنگا ترین ، وینزویلا میں ڈیزل سستا ، ڈیزل میں پاکستان کا 45واں نمبر ، بھارت میں یومیہ، پاکستان میں 15دن اور دیگر جنوبی ایشیائی ممالک میں ماہانہ بنیادوں پر قیمتوں کا تعین ہوتا ہے ۔ تفصیلات کے مطابق پٹرول کے لحاظ سے سستے ترین ممالک کی درجہ بندی میں پاکستان36 ، بنگلادیش46 جب کہ بھارت 73درجے پر ہے، دیگر جنوبی ایشیائی ممالک میں بھوٹان 22، افغانستان 31، مالدیپ34، نیپال75 اورسری لنکا 86 درجے پر ہے ۔ڈیزل کے لحاظ سے سستے ترین ممالک کی درجہ بندی میں پاکستان45، بنگلادیش 31 جب کہ بھارت 61 درجے پر ہے، دیگر ایشیائی ممالک میں بھوٹان 26، افغانستان 30، مالدیپ38،سری لنکا 66اور نیپال 79درجے پر ہے ۔ پٹرول کی قیمت (جو کچھ ممالک میں گیسولین کہلاتی ہے) مختلف ممالک میں مختلف ہوتی ہے اور اس کی کئی وجوہات ہیں جن میں خام تیل کی قیمت، مقامی کرنسی کا امریکی ڈالر کے مقابلے میں تبادلہ نرخ، حکومت کی طرف سے عائد کردہ ٹیکس اور ڈیوٹیز، اور ریفائننگ اور تقسیم کی لاگت شامل ہیں۔پٹرولیم مصنوعات کی قیمتوں کے حوالے سے 169ممالک کاڈیٹا رکھنے والی ’گلوبل پٹرول پرائسز‘ جن کا حوالہ دنیا کے معتبر ذرائع ابلاغ دیتے ہیں جن میں رائٹرز،اے پی، بلوم برگ، نیویارک ٹائمز، سی این این شامل ہیں۔ رپورٹ میں پاکستانی روپے کے لحاظ سے قیمتوں کو درج کیا گیا ہے۔اس کے 27 جنوری 2025کے دستیاب اعدادوشمار اور امریکی ٹی وی سی این بی سی کی روپوٹ کے مطابق پٹرول کے لحاظ سے سستے ترین پہلے دس ممالک میں سرفہرست ایران ہے جہاں پٹرول 7روپے 98 پیسے فی لیٹر ہے۔ بالترتیب دیگر ممالک میں لیبیا 8 روپے 52 پیسے، وینزویلا 9 روپے 76پیسے، انگولا 91روپے 58پیسے، مصر 94 روپے 39 پیسے، الجیریا 94 روپے 87 پیسے، کویت 94 روپے 97پیسے، ترکمانستان 119 روپے 38 پیسے، ملائشیا 130روپے 14پیسے، اور قازقستان 131 روپے 90 پیسے فی لیٹر ہے۔ پٹرول کے لحاظ سے مہنگے ترین پہلے دس ممالک میں سرفہرست ہانگ کانگ ہے جہاں پٹرول فی لیٹر 950روپے 4پیسےہے، بالترتیب دیگر ممالک میں آئس لینڈ 628روپے 59پیسے، ڈنمارک 594روپے 45پیسے، نیدرلینڈ 575 روپے62 پیسے، سنگاپور 574روپے 67پیسے، اسرائیل 572روپے 23 پیسے، سویٹزر لینڈ 543 روپے 47پیسے، یونان 536روپے 93پیسے، بارباڈوس 535 روپے 40 پیسے اور ناروے 534 روپے 74 پیسے فی لیٹر ہے۔ ڈیزل فی لیٹر قیمت کے لحاظ سے سستے ترین پہلے دس ممالک میں سرفہرست وینزویلا ہے جہاں ایک روپیہ 16 پیسے فی لیٹر ڈیزل ہے۔ بالترتیب دیگر ممالک میں ایران ایک روپیہ 60 پیسے، لیبیا 8 روپے 51 پیسے، الجیریا 59 روپے 87 پیسے، انگولا 61 روپے 5 پیسے، مصر 74 روپے 96 پیسے، ترکمانستان 79 روپے 59 پیسے، کویت 104 روپے، سعودی عرب 123روپے 42پیسے، اور ایکواڈور 132 روپے 45 پیسے فی لیٹر ہے۔ ڈیزل فی لیٹر قیمت کے لحاظ سے مہنگے ترین پہلے دس ممالک میں سرفہرست ہانگ کانگ ہے جہاں ڈیز فی لیٹر 925 روپے 34 پیسے ہے،بالترتیب دیگر ممالک میں آئس لینڈ 650 روپے 21 پیسے، سویٹزرلینڈ 575 روپے 24 پیسے، ڈنمارک 574 روپے 96 پیسے، اسرائیل 543 روپے 77پیسے، سنگاپور 525روپے 54 پیسے، ناروے 524 روپے 11 پیسے، نیدر لینڈ 518 روپے 3 پیسے، آئرلینڈ 509 روپے 27 پیسے، اور اٹلی 508 روپے 54 پیسے فی لیٹر ہے۔ پاکستان میں یکم فروری سے پٹرول کی قیمت257 روپے13پیسے فی لیٹرجب کہ ڈیزل کی قیمت267 روپے 95پیسے مقرر کی گئی۔ پاکستان میں ہر پندرہ دن کے بعد پٹرولیم مصنوعات کی قیمتوں میں ردوبدل کیا جاتا ہے۔ یکم فروری 2025کے مطابق، بھارت کے دارالحکومت نئی دہلی میں ایک لیٹر پٹرول کی قیمت 305روپے(94 روپے77 پیسے) جب کہ ڈیزل 282 روپے (87روپے67پیسے) تھی۔ بھارت میں پٹرولیم قیمتیں روزانہ صبح 6 بجے دوبارہ متعین کی جاتی ہیں۔ جون 2017 سے بھارت میں پٹرول کی قیمت روزانہ کی بنیاد پر تبدیل کی جاتی ہے، اور اسے ’’ڈائنامک پٹرول پرائس میتھڈ‘‘ کہا جاتا ہے۔ بھارت کی ہر ریاست اور شہر میں پٹرولیم قیمتیں مختلف ہوتیں ہیں ان وجوہات میں ریاستی ٹیکس اور ڈیوٹیز یعنی ویلیو ایڈڈ ٹیکس ،نقل و حمل کی لاگت،مقامی ڈیلرز کی قیمتوں کا تعین اوردیگر عوامل ہیں۔ یکم فروری سے بنگلہ دیش میں پٹرول کی فی لیٹر قیمت 279 روپے (122 ٹکہ) جب کہ ڈیزل240روپے( 105ٹکہ) فی لیٹر ہے۔بنگلہ دیش میں پٹرولیم مصنوعات کی قیمتوں میں ردوبدل عموماً مہینے بعد کیا جاتا ہے۔ سری لنکا میں یکم فروری سے پٹرول کی قیمت347روپے(371 سری لنکن روپے) جب کہ ڈیزل310روپے(331 سری لنکن روپے) فی لیٹر ہے، سری لنکا میں بھی مہینے بعد قیمتوں میں تبدیلی کی جاتی ہے۔ نیپال میں پٹرول فی لیٹر332روپے(165روپے50پیسے سے167 نیپالی روپے )کے درمیان ہے جب کہ ڈیزل کی قیمت316روپے(157روپے 50پیسے سے160 نیپالی روپے) کے درمیان ہے۔ یاد رہے کہ نیپال میں پٹرولیم مصنوعات کی تین مختلف قیمتیں دی جاتی ہیں، ملک کے مختلف علاقوں اور شہروں کو تین گروپس میں تقسیم کیا گیا ہے اور ان تینوں کے لئے مختلف قیمتیں ہیں۔ ماہانہ بنیادوں پر قیمتوں کا تعین کیا جاتا ہے۔
