• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اسرائیلی وزیراعظم کی اہلیہ سارا نیتن یاہو کیخلاف فوجداری تحقیقات شروع

آج کا اخبار
اہم خبریں
03 فروری ، 2025
مقبوضہ بیت المقدس (اے ایف پی، جنگ نیوز) اسرائیل کے اٹارنی جنرل کے دفتر نے اتوار کے روز ایک بیان میں کہا ہے کہ وزیر اعظم نیتن یاہو کی اہلیہ سارہ نیتن یاہو کے خلاف فوجداری نوعیت کے جرائم کی تحقیقات کا آغاز کر دیا گیا ہے، سار ا پر الزام ہے کہ انہوں نے نیتن یاہو کیخلاف مقدمات میں جعلسازی کے ذریعے مقدمات پر اثر انداز ہونے کی کوشش کی ۔ صیہونی وزیر اعظم اس سے پہلے بین الاقوامی فوجداری عدالت کو جنگی جرائم میں ملوث ہونے کے الزام میں مطلوب ہیں اور ان کے وارنٹ گرفتاری بھی جاری کئے جا چکے ہیں۔ جبکہ ملک کے اندر وہ کرپشن اور اختیارات کے ناجائز استعمال کے مقدمات کا عدالتوں میں سامنا کر رہے ہیں۔ اب سارا نیتن یاہو کے خلاف بھی اٹارنی جنرل نے ایسے وقت میں تحقیقات کی اطلاع دی ہے جب خبریں آ چکی ہیں کہ سارا امریکی خاتون اول کے ساتھ وائٹ ہاؤس میں منگل کے روز عشائیہ کریں گی۔ واضح رہے نیتن یاہو اتوار کے روز ہی واشنگٹن کے دورے پر روانہ ہوئے ہیں۔ اسرائیلی اٹارنی جنرل کے دفتر کے مطابق سارا یاہو کے خلاف ʼکرمنل انویسٹی گیشنʼ شروع کی گئی ہے۔ اٹارنی جنرل کے دفتر نے اس کا ذکر ایک رکن پارلیمنٹ کے نام ایک خط میں بھی کیا ہے، یہ خط اسی رکن پارلیمنٹ کو لکھا گیا ہے جس نے الزام عائد کیا ہے کہ سارا نیتن یاہو اپنے شوہر کے خلاف کرپشن کے مقدمات میں ایسی جعلسازی کی جو مقدمات پر اثر انداز ہونے کی مجرمانہ کوشش کے زمرے میں آتی ہے۔ ڈیموکریٹس کے رکن پارلیمنٹ نعمہ لازیمی نے اتوار کو X پر خط شیئر کیا جس میں اس بات کی تصدیق کی گئی کہ فوجداری تحقیقات 26 دسمبر کو شروع کی گئی تھیں، انہوں نے مزید کہا کہ اسرائیلی چینل 12 کے یووڈا نیوز پروگرام کی تحقیقات کے بعد ان کے دفتر نے ریاستی اٹارنی سے رابطہ کیا تھا۔
اہم خبریں سے مزید