• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جون 2026 تک کراچی کو 260 ملین گیلن صاف پانی دیا جائیگا، جنرل سجاد غنی

آج کا اخبار
اہم خبریں
20 مارچ ، 2025
اسلام آباد(اسرار خان ) واپڈا کے چیئرمین لیفٹیننٹ جنرل (ر) سجاد غنی نے سینیٹ کی قائمہ کمیٹی برائے آبی وسائل کو بریفنگ دیتے ہوئے بتایا کہ کراچی کو K-IV منصوبے کے تحت جون 2026 تک روزانہ 260ملین گیلن صاف پانی فراہم کیا جائے گا۔ منصوبے کا 50 فیصد کام مکمل ہو چکا ہے، جس کی تعمیر ستمبر 2022 میں شروع ہوئی تھی۔تاہم انہوں نے واضح کیا کہ شہر کے اندر پانی کی تقسیم کا نظام تاحال طے نہیں ہوا، اور اسے حتمی شکل دینے میں مزید 2 سے 3 سال لگ سکتے ہیں۔ کراچی واٹر اینڈ سیوریج بورڈ (KWSB) نے تقسیم کے نیٹ ورک کے لیے ابھی تک ٹینڈرز جاری نہیں کیے۔سینیٹر ہمایوں مہمند نے اس صورتحال پر تشویش کا اظہار کرتے ہوئے کہا کہ "یہ بجلی کی پیداوار جیسا معاملہ بن رہا ہے—پیداوار موجود ہے، لیکن ترسیل کا نظام نہیں۔" انہوں نے وفاقی حکومت سے مطالبہ کیا کہ وہ اس مسئلے کو سندھ حکومت کے ساتھ اٹھائے۔سینیٹ کمیٹی، جس کی صدارت سینیٹر شہادت اعوان کر رہے تھے، نے آئندہ مالی سال کے ترقیاتی منصوبوں کا جائزہ بھی لیا۔ وزارت آبی وسائل نے 33 نئے آبی منصوبے تجویز کیے جن میں سندھ کے 3، خیبرپختونخوا کے 19، اور پنجاب کے 7 منصوبے شامل ہیں، جبکہ بلوچستان کے لیے کوئی نیا منصوبہ شامل نہیں کیا گیا۔ حکام کے مطابق، 10 جاری اسکیمیں موجودہ مالی سال میں مکمل کی جائیں گی، جبکہ سندھ بیراج کے لیے فزیبلٹی اسٹڈی آئندہ بجٹ میں رکھی جائے گی۔
اہم خبریں سے مزید