فرمان الہی
نماز کے اوقات
اسلام آباد(نمائندہ جنگ )وزیراعظم شہباز شریف اور سعودی ولی عہد و وزیر اعظم شہزادہ محمد بن سلمان کا پاکستان اور سعودی عرب کے درمیان بڑھتے اقتصادی تعاون پر اطمینان کا اظہار کرتے ہوئے خطے میں امن‘استحکام اور خوشحالی کے لیے اپنے مشترکہ وژن کو فروغ دینے کے لیے ہر سطح پر مل کر کام کرنے پر اتفاق‘اقتصادی‘ تجارتی‘ سرمایہ کاری‘ توانائی اور دفاعی شعبوں میں تعاون بڑھانے پر بات چیت ‘وزیراعظم اور ولی عہد نے دوطرفہ شراکت داری کو نئی بلندیوں تک پہنچانے کے عزم کا اعادہ کیاجبکہ شہبا زشریف سے سعودی وزیر سرمایہ کاری خالد الفالح اور جوائنٹ ٹاسک فورس برائے اقتصادی مصروفیات کے سربراہ محمد التویجری نے بھی ملاقات کی۔ ملاقات میں اقتصادی تعاون کو مضبوط بنانے، پاکستان میں مزید سعودی سرمایہ کاری لانے اور اہم شعبوں میں مشترکہ اقدامات کو تیز کرنے پر تبادلہ خیال کیا گیا۔شہباز شریف نےسعودی سرمایہ کاروں اور کاروباری اداروں کوتوانائی ‘ انفرسٹرکچر‘ زراعت اور ٹیکنالوجی سمیت مختلف شعبوں میں خصوصی سرمایہ کاری سہولت کونسل (ایس آئی ایف سی )کے تحت کاروباری مواقع تلاش کرنے کی دعوت دی‘علاوہ ازیں شہباز شریف نے جمعرات کی شب مسجد نبوی میں حاضری دی اوروفد کے ہمراہ روضہ رسول کی زیارت کی سعادت حاصل کی۔وزیر اعظم اور انکے وفد کے لئے خصوصی طور پر ریاض الجنتہ کے دروازے کھولے گئے۔ وزیراعظم نے وفد کے ہمراہ ریاض الجنتہ میں نوافل ادا کئے۔ وزیراعظم نے امت مسلمہ میں اتحاد و یگانگت اور پاکستان کی ترقی و خوشحالی کے لیے دعا مانگی۔جمعرات کو جاری بیان کے مطابق شہباز شریف نے سعودی عرب کے سرکاری دورے کے دوران جدہ میں ولی عہد محمد بن سلمان سے ملاقات کی‘اس موقع پر نائب وزیر اعظم و وزیر خارجہ اسحاق ڈار‘ آرمی چیف جنرل سید عاصم منیر اور وزیر اعلیٰ پنجاب مریم نواز بھی موجود تھے‘وزیراعظم نے اہم شعبوں میں سرمایہ کاری بڑھانے کے لیے سعودی عرب کے عزم کو سراہا جو پاکستان کی اقتصادی ترقی اور استحکام میں معاون ثابت ہوگا۔ فریقین نے علاقائی سلامتی کے مسائل سے نمٹنے کے لیے دفاعی اور سکیورٹی تعاون کو مضبوط بنانے کے اپنے عزم کا اعادہ کیا۔ دونوں رہنماؤں نے ابھرتی علاقائی صورتحال کے ساتھ ساتھ خطے کے سیاسی منظر نامے پر بھی بات چیت کی۔ علاوہ ازیں شہبا زشریف سے سعودی وزیر سرمایہ کاری خالد الفالح اور جوائنٹ ٹاسک فورس برائے اقتصادی مصروفیات کے سربراہ محمد التویجری نے ملاقات کی۔خالد الفالح اورمحمد التویجری نے پاکستان کے ساتھ اقتصادی تعلقات کو مزید گہرا کرنے میں سعودی عرب کی گہری دلچسپی کا اظہار کیا۔ انہوں نے سرمایہ کاری کے منصوبوں کو تیز کرنے اور ان پر عمل درآمد کو یقینی بنانے کے لئے ادارہ جاتی تعاون کو بڑھانے پر تبادلہ خیال کیا۔ فریقین نےباقاعدہ اور منظم رابطوں اور مشترکہ منصوبوں پر تیزی سے عملدرآمد کے ذریعے پاکستان سعودی اقتصادی شراکت داری کو مزید مستحکم بنانے پر اتفاق کیا۔دریں اثناءوزیراعظم نے کہا ہے کہ شہزادہ محمد بن سلمان سےملاقات میں باہمی تعاون کے فروغ کے لئے تعمیری گفتگوہوئی ‘مشرق و سطیٰ اور یوکرین میں امن کے لئے سعودی عرب کاکردار قابل ستائش ہے۔ جمعرات کو سماجی رابطے کی ویب سائٹ پر اپنی پوسٹ میں وزیراعظم نے کہا کہ سعودی ولی عہد سے ملاقات میں پاکستان اور سعودی عرب کے درمیان تجارت، سرمایہ کاری ، توانائی اور سکیورٹی کے شعبوں میں تعاون بڑھانے پر تبادلہ خیال کیاگیا ۔ انہوں نے کہاکہ سعودی عرب کے پاکستان سے مسلسل تعاون پر ولی عہدشہزادہ محمد بن سلمان کے شکر گزار ہیں۔ہماری پائیدار دوستی اور خوشحالی کے لئے مشترکہ وژن کی بدولت باہمی تعلقات نئی بلندیوں کو چھو رہے ہیں اور مضبو ط دوطرفہ تعلقات باہمی اقتصادی شراکت میں تبدیل ہو رہے ہیں۔
