فرمان الہی
نماز کے اوقات
کراچی (اسٹاف رپورٹر/ جنگ نیوز) پاکستان نے آئرلینڈ کی ٹیم کو آئی سی سی خواتین ورلڈ کپ کوالیفائر کے پہلے میچ میں 38 رنز سے شکست دے کر ایونٹ کا فاتحانہ آغاز کیا۔ پاکستان کی بولنگ ’’پرنسس‘‘ ڈیانا بیگ کے چار وکٹ ،عالیہ ریاض کی جارحانہ بیٹنگ نے فتح میں اہم کردار ادا کیا۔ ڈیانا بیگ نے ون ڈے انٹرنیشنل میں اپنی وکٹوں کی نصف سنچری بھی مکمل کرلی۔ بدھ کو قذافی اسٹیڈیم لاہور میں آئرلینڈ نے ٹاس جیت کر پاکستان کو بیٹنگ دی جو 49 اوورز میں217 رنز بناکر آؤٹ ہوگئی۔ عالیہ ریاض نے چار چوکوں اور ایک چھکے کی مدد سے52 ، سدرہ امین نے51 ،منیبہ علی نے 32 رنز اسکور کئے۔ منیبہ علی اور سدرہ امین نے دوسری وکٹ کی شراکت میں 77 رنز کا اضافہ کیا۔ آئرلینڈ کی جین میگائر نے 33 رنز دے کر3 ، آرلین کیلی اور کارا مرے نے دو دو وکٹیں حاصل کیں۔ ناکام ٹیم جواب میں 179 رنز بناکر آؤٹ ہوگئی۔ کپتان گیبی لوئس اور ایمی ہنٹر نے 44،44 رنز اسکور کیے۔ ان دونوں کو نشرہ سندھو نے آؤٹ کیا۔ انہوں نے اپنی تیسری وکٹ لورا ڈیلینی کو آؤٹ کرکے حاصل کی۔ ڈیانا بیگ نے35 رنز دے کر4 اور سعدیہ اقبال نے33 رنز کے عوض 2 وکٹیں حاصل کیں۔ ایک موقع پر آئرلینڈ نے2 وکٹوں پر113 رنز بنائے تھے لیکن آخری 8 وکٹیں صرف66 رنز پر گرگئیں ۔ ایک اور میچ میں اسکاٹ لینڈ نے فیورٹ ویسٹ انڈیز کو 11 رنز سے ہرادیا۔ ویسٹ انڈین کپتان ہیلی میتھیوز نے سنچری بنائی اور چار وکٹ لیے لیکن ٹیم کو فتح نہ دلاسکیں۔ فاتح ٹیم نے 45 اوور میں 244رنز پر آئوٹ ہوگئی۔ہیلی میتھیوز نے چار شکار کیے۔ جواب میں ویسٹ انڈیز 47 ویں اوور میں 233 پر ہمت ہارگئی۔ ہیلی میتھیوز نے ناٹ آئوٹ 114 رنز بنائے۔ وہ میچ کی بہترین پلیئر قرار پائیں۔
