فرمان الہی
نماز کے اوقات
بھارت میں بزنس مین نے اپنی بیوی کو قتل کرکے لاش نالے میں پھینک دی، پولیس نے ناک کی لونگ سے معاملے کا پتہ چلا لیا۔
بھارتی میڈیا کے مطابق دہلی کے ایک نالے سے ایک ماہ قبل ملنے والی خاتون کی لاش کے معمہ کو پولیس نے ایک چھوٹی سی ناک کی لونگ کی مدد سے حل کر لیا۔ جس کے بعد پولیس نے مقتولہ کے شوہر اور کاروباری شخصیت انیل کمار کو گرفتار کر لیا ہے، جن پر اپنی بیوی کو قتل کر کے لاش نالے میں پھینکنے کا الزام ہے۔
15 مارچ کو دہلی کے ایک نالے سے ایک خاتون کی لاش برآمد ہوئی تھی جو چادر میں لپٹی ہوئی اور پتھر و سیمنٹ کے تھیلے سے بندھی ہوئی تھی۔ پولیس کو لاش کے ساتھ ایک ناک کی لونگ بھی ملی، جس نے اس سنسنی خیز واردات کا سراغ دے دیا۔
تحقیقات کے دوران پتا چلا کہ یہ ناک کی لونگ جنوبی دہلی کے ایک جیولری اسٹور سے خریدی گئی تھی، جس کی رسید انیل کمار کے نام پر تھی۔ انیل کمار دہلی کے ایک پراپرٹی ڈیلر ہیں اور گڑگاؤں کے فارم ہاؤس میں رہائش پذیر تھے۔
خاتون کی شناخت 47 سالہ سیما سنگھ کے طور پر ہوئی، جو انیل کمار کی بیوی تھیں۔ جب پولیس نے انیل سے ان کی بیوی سے بات کرنے کی درخواست کی تو انہوں نے دعویٰ کیا کہ وہ دوسرے شہر وردوان گئی ہوئی ہیں اور ان کے پاس فون نہیں ہے۔ تاہم تفتیش کے دوران ان کے بیانات میں تضاد سامنے آیا۔
پولیس نے انیل کمار کے دفتر سے ایک ڈائری میں سیما کی بہن ببیتا کا نمبر حاصل کیا، جنہوں نے بتایا کہ سیما سے ان کی آخری بات 11 مارچ کو ہوئی تھی۔ انیل نے اہل خانہ کو کبھی بتایا کہ وہ جے پور میں ہیں، کبھی کہا کہ وہ بات نہیں کرنا چاہتیں، جس پر اہل خانہ تشویش میں مبتلا ہو گئے۔
رپورٹ کے مطابق یکم اپریل کو پولیس نے اہل خانہ کو ایک خاتون کی لاش کی شناخت کے لیے بلایا، جس کی شناخت سیما کے طور پر ہوئی۔ پوسٹ مارٹم رپورٹ کے مطابق انہیں گلا گھونٹ کر قتل کیا گیا تھا۔
پولیس نے انیل کمار اور ان کے محافظ شیو شنکر کو گرفتار کر لیا ہے اور معاملے کی مزید تفتیش جاری ہے۔
