فرمان الہی
نماز کے اوقات
اسلام آباد (نمائندہ جنگ، مانیٹرنگ ڈیسک) جوڈیشل کمیشن نے جسٹس علی باقر نجفی کی بطور جج سپریم کورٹ تعیناتی کی منظوری دیدی۔ چیف جسٹس یحییٰ آفریدی کی سربراہی میں جوڈیشل کمیشن کا ڈھائی گھنٹے طویل اجلاس ہوا۔ جس میں لاہور ہائی کورٹ کے جسٹس علی باقر نجفی کو سپریم کورٹ میں تعینات کرنے کی منظوری دی گئی۔ ذرائع کے مطابق جسٹس علی باقر نجفی کی تعیناتی کی منظوری اکثریت کی بنیاد پر دی گئی۔جوڈیشل کمیشن اجلاس میں اور بھی کئی فیصلے کیے گئے۔جبکہ چار ریٹائرڈ ججوں کو جوڈیشل کمیشن کے نئے اراکین کے طور پر مقرر کرنے کی متفقہ منظوری دیدی ہے۔ جسٹس ریٹائرڈ مقبول باقر کو سندھ سے جبکہ بلوچستان ہائیکورٹ سے جسٹس ریٹائرڈ نذیر لانگو کو جوڈیشل کمیشن کا ممبر تعینات کرنے کی منظوری دی گئی۔ اسی طرح اسلام ہائیکورٹ سے جسٹس ریٹائرڈ شوکت عزیز صدیقی، پشاور ہائی کورٹ سے جسٹس ریٹائرڈ شاکر اللہ جان کو ممبر جوڈیشل کمیشن تعینات کرنے کی منظوری دی گئی۔ذرائع کے مطابق پاکستان تحریک انصاف ( پی ٹی آئی ) کے دو ممبران نے جوڈیشل کمیشن اجلاس میں جسٹس علی باقر نجفی کی تقرری کی حمایت میں ووٹ دیا۔
