فرمان الہی
نماز کے اوقات
اسلام آباد(رپورٹ ، تنویر ہاشمی) امریکا کی جانب سے پاکستان کی برآمدات پر 29فیصد جوابی ٹیرف عائد ہونے سے پاکستان کی امریکا کو برآمدات میں 20سے 25 فیصد کمی آجائے گی۔
پاکستان کی امریکا کو برآمدات کے حجم میں1ارب 10کروڑ ڈالرز سے1ارب 40 کروڑ ڈالرز تک کمی آسکتی ہے، پیداوار کم ہونے سے 5 لاکھ ملازمتیں ختم ہوسکتی ہیں اور بھارت، بنگلادیش پاکستان کا شیئر حاصل کرسکتے ہیں۔
پاکستان انسٹیٹوٹ آف ڈویلپمنٹ اکنامکس (پائیڈ) کی رپورٹ کے مطابق گزشتہ مالی سال 24-2023 میں پاکستان نے امریکا کو 5 ارب 30 کروڑ ڈالرز کی مصنوعات برآمد کی ہیں جن میں بڑا حصّہ ٹیکسٹائل کا ہے۔
پائیڈ کے وائس چانسلر ڈاکٹر ندیم جاوید کے مطابق یہ لمحہ پاکستان کی برآمدات کےلیے صرف خطرے کی گھنٹی نہیں بلکہ اس کو ہمیں ایک اہم موقع، سٹریٹجک ایکسپورٹ مستقبل کے طور پر دیکھنا ہوگا اور اپنی سمت کو درست کرنا ہوگا۔
پاکستان کی تجارت میں امریکی جوابی ٹیرف کے تباہ کن اثرات بھی مرتب ہوسکتے ہیں ، جس سے میکرو اکنامک عدم استحکام ، روزگار کے مواقع میں کمی اور کرنسی کی قدر پر بھی منفی اثرات ہوسکتے ہیں۔
